“Bank of America” İngiltərə Bankının gələn həftə keçiriləcək iclasında baza faiz dərəcəsini 3,75 faiz səviyyəsində dəyişməz saxlayacağını gözləyir. Bank həmçinin 2026-cı ilin oktyabrından etibarən kəmiyyət sərtləşdirilməsi (QT) proqramının tempinin hazırkı 70 milyard funt-sterlinqdən 50 milyard funt-sterlinqə endiriləcəyini proqnozlaşdırır.
“Bank of America”nın təhlilinə görə, faiz qərarı üzrə səsvermənin 6-3 nisbətində olması gözlənilir. Belə ki, Pill, Qrin və Mannın faiz dərəcəsinin artırılmasına səs verəcəyi ehtimal olunur. Lombardellinin də artımı dəstəkləməsi mümkündür, lakin bu ssenarinin reallaşma ehtimalı daha aşağı qiymətləndirilir.
Təhlildə bildirilir ki, enerji daşıyıcılarının qiymətlərində artım müşahidə olunsa da, bunun baza inflyasiyasına və əməkhaqqı artımına ikinci dərəcəli təsirlər vasitəsilə keçdiyini göstərən sübutlar hələ məhduddur. Eyni zamanda, baza faiz dərəcəsi iqtisadi aktivlik üçün məhdudlaşdırıcı olaraq qalır, maliyyə şərtləri isə daha da sərtləşib.
“Bank of America” İngiltərə Bankının iyul iclası ilə müqayisədə daha sərt ritorikadan istifadə edəcəyini düşünür. Mərkəzi bankın yüksək enerji qiymətləri fonunda inflyasiyanın sürətlənməsi risklərinin artdığını vurğulaması, eləcə də dördüncü rüb üzrə inflyasiya proqnozunu yüksəldərək təxminən 3,5 faizə çatdırması gözlənilir.
Bankın fikrincə, enerji qiymətlərinin hazırkı səviyyəsi İngiltərə Bankının daha əvvəl nəzərdən keçirdiyi neqativ ssenariyə yaxındır, lakin bu şok hələlik kifayət qədər davamlı xarakter daşımır. Bu səbəbdən mərkəzi bank davam edən qeyri-müəyyənliyi və ikinci dərəcəli təsirlərin məhdudluğunu nəzərə alaraq, yaxın müddətdə faiz artımına dair qəti və ya şərtsiz siqnal verməkdən çəkinə bilər.
“Bank of America” 2026-cı ilin sonunadək faiz dərəcələrinin dəyişməz qalacağı, daha sonra isə 2027-ci ilin noyabrında 3,5 faizə endiriləcəyi ilə bağlı proqnozunu qüvvədə saxlayır. Bununla yanaşı, güclü ikinci dərəcəli inflyasiya təsirləri ortaya çıxarsa, cari ilin sonu və ya gələn ilin əvvəlində faiz artımı risklərinin yüksəldiyi qeyd olunur. Bu baxımdan noyabr, dekabr və fevral iclasları bank tərəfindən xüsusilə diqqətçəkən və qərarların dəyişə biləcəyi “aktiv” iclaslar kimi qiymətləndirilir.
Bank gələn ilə qədər bazarda formalaşan təxminən dörd faiz artımı gözləntisini həddindən artıq yüksək hesab edir. Funt sterlinqlə bağlı isə “Bank of America” bildirir ki, bazar kotirovkalarında artıq dörd faiz artımı nəzərə alındığından, İngiltərə Bankının gözləntiləri üstələməsi üçün kifayət qədər geniş imkan mövcuddur.
MONETAR.AZ
