Böyük Britaniyada siyasi gərginliyin artması fonunda funt sterlinq ABŞ dollarına qarşı dəyər itirərək son bir ayın minimum səviyyəsinə düşüb.
Məzənnədəki azalma Böyük Mançester meri Endi Börnhamın Britaniya parlamentinə namizədliyini irəli sürəcəyini açıqlamasından sonra qeydə alınıb.
Məlumata əsasən, bu addım hazırkı baş nazir Kir Starmer üçün siyasi təzyiqləri artıra bilər. Bildirilir ki, parlament üzvü Coş Saymons mandatından imtina edərək Börnham üçün yer açıb.
Böyük Britaniya mediasında bəzi nazirlərin baş nazirlə görüşərək onun istefasını tələb edə biləcəyi barədə məlumatlar da yayılıb. Səhiyyə naziri Ues Stritinqin istefası isə siyasi qeyri-sabitliyi daha da gücləndirib.
Valyuta bazarında 1 funt sterlinq təxminən 1,34 ABŞ dolları səviyyəsində ticarət olunub. Analitiklər hesab edirlər ki, siyasi qeyri-müəyyənlik qısa müddətdə valyuta bazarında təzyiqi artırmağa davam edə bilər.
MONETAR.AZ
