Çərşənbə günü investorların ABŞ Federal Ehtiyat Sisteminin (FED) faiz dərəcələri ilə bağlı qərarı ərəfəsində dollar üzrə iri mövqelər açmaqdan çəkinməsi fonunda sterlinq demək olar ki, dəyişməz qalıb, avro isə cüzi ucuzlaşıb.
Saat 14:52-yə olan məlumata görə, GBP/USD məzənnəsi 0,03% geriləyərək 1,3289, EUR/USD isə 0,05% azalaraq 1,1384 səviyyəsində ticarət olunub.
ING Bankının valyuta strateqi Françesko Pezolenin sözlərinə görə, bazarda FES-in gözlənilmədən faiz artıra biləcəyi ehtimalı ilə qabaqlayıcı mövqelərin formalaşdırılması dollara dəstək verir.
"FED-in faiz dərəcəsini gözlənilmədən artıra biləcəyi ehtimalı ilə aparılan qabaqlayıcı mövqeləşmə FOMC-nin bugünkü bəyanatı ərəfəsində dolları dəstəkləyə bilər. Hazırda bazarda məhz bu proses müşahidə olunur", – deyə Pezole bildirib.
Onun sözlərinə görə, ABŞ-da istehlakçı inamının zəifləməsinə baxmayaraq, dollar indeksi son günlər neft qiymətlərindəki enişə qarşı zəif reaksiya verir. Bununla belə, bazarın faiz artımı ehtimalını 25–30% səviyyəsində qiymətləndirdiyini nəzərə alan strateq dolların dayanıqlığının məhz bugünkü qərarla ciddi sınaq qarşısında qalacağını bildirib.
Pezole hesab edir ki, əgər FED sədri Kevin Uorş sərt ("şahin") ritorika nümayiş etdirməzsə və ya faiz artımını dəstəkləyən səslərin sayı ikini keçməzsə, dollar gün ərzində təzyiq altında qala bilər. Onun proqnozuna görə, dollar indeksi həftənin sonunadək 101,0 səviyyəsini test edə bilər.
Bazarın əsas ssenarisi FED-in faiz dərəcəsini dəyişməz saxlamasını nəzərdə tutur. Eyni zamanda, Komitənin iki üzvü — Lori Loqan və Bet Hammakın faiz artımının lehinə səs verəcəyi gözlənilir.
ING bildirir ki, bu ssenari ilin sonuna qədər ümumilikdə 41 bazis bəndi həcmində faiz endirimi gözləntilərini dəyişməyəcək. Bununla belə, tənzimləyicinin dərəcəni sabit saxlaması dollar üzrə qabaqlayıcı mövqelərin bağlanmasına səbəb ola və ABŞ valyutasının neft qiymətlərindəki enişə yenidən daha həssas reaksiya verməsinə şərait yarada bilər.
Treyderlər daxili makroiqtisadi statistikadan daha çox FES-in qərarına və bu həftə keçiriləcək İngiltərə Bankının iclasına fokuslandıqları üçün sterlinq son bir ayın minimum səviyyələrinə yaxın ticarət olunmağa davam edib.
Avroya gəlincə, ING analitikləri Fars körfəzində hərbi əməliyyatların yenidən intensivləşməsinin bazarlarda ehtiyatlı əhval-ruhiyyəni qoruduğunu bildirirlər. Bununla belə, bank hesab edir ki, EUR/USD cütlüyü ötən həftə artıq lokal minimumunu formalaşdırıb.
Analitiklərin fikrincə, avronun 1,15 səviyyəsindən yuxarı möhkəmlənməsi üçün iki əsas şərt lazımdır: FES-in daha yumşaq ("göyərçin") mövqe nümayiş etdirməsi və ya ABŞ-dan zəif makroiqtisadi göstəricilər, həmçinin qlobal risk aktivlərində əhval-ruhiyyənin sabitləşməsi.
ING-in baza ssenarisinə əsasən, FED-in yumşaq mesaj verməsi yaxın günlərdə EUR/USD məzənnəsinin 1,1400–1,1450 diapazonuna yüksəlməsinə imkan yarada bilər.
Bununla yanaşı, əgər Kevin Uorş bazarı sərt bəyanatlarla təəccübləndirərsə və ya faiz artımını dəstəkləyən Komitə üzvlərinin sayı gözləniləndən çox olarsa, dolların möhkəmlənməsi davam edə, avro və sterlinqin bərpası isə daha gec baş verə bilər.
MONETAR.AZ
