Avropa Mərkəzi Bankının (AMB) prezidenti Kristin Laqard hökumətləri dövlət maliyyəsinin dayanıqlığını təmin etməyə çağırıb. O xəbərdarlıq edib ki, artan dövlət borcu və enerji sektorunda inflyasiya riskləri avrozonanın iqtisadi sabitliyini təhdid edir.
Beynəlxalq Valyuta Fondunun (BVF) Tailandda keçirilən illik iclasında çıxış edən Laqard fiskal dayanıqlığın ümumi iqtisadi sabitliyin əsas şərtlərindən biri olduğunu vurğulayıb.
AMB rəhbərinin sözlərinə görə, hökumətlər maliyyə ehtiyatlarını bərpa etmək üçün fiskal qaydalara ciddi əməl etməli, dövlət borcunu azaltmalı və büdcə xərclərinin səmərəliliyini artırmalıdırlar. Enerji qiymətlərindəki artımın təsirlərini yumşaltmaq məqsədilə tətbiq olunan dəstək tədbirləri isə uzunmüddətli büdcə yükü yaratmamaq üçün müvəqqəti və ünvanlı xarakter daşımalıdır.
Laqard bu fikirləri maliyyə nazirləri və mərkəzi bank rəhbərlərinin dövlət borcunun artımını, geosiyasi gərginlikləri və süni intellektin iqtisadiyyata təsirlərini müzakirə etdiyi paneldə səsləndirib. O, həmçinin açıqlıq və proqnozlaşdırıla bilən qaydalara əsaslanan beynəlxalq iqtisadi sistemin bərpasının qlobal ticarətə və investisiyalara dəstək verəcəyini bildirib.
AMB İdarə Heyətinin üzvü, Finlandiya Mərkəzi Bankının rəhbəri Olli Ren də iqtisadi və ideoloji parçalanma riskləri fonunda beynəlxalq əməkdaşlığın əhəmiyyətini vurğulayıb.
Laqard avrozonanın iqtisadi perspektivlərini qiymətləndirərkən artım risklərinin aşağı, inflyasiya risklərinin isə yuxarı istiqamətli olduğunu qeyd edib. Bu vəziyyət enerji qiymətlərinin dinamikası və onların istehlak qiymətlərinə mümkün təsiri ilə bağlı narahatlıqları artırır.
Bazar iştirakçıları inflyasiya təzyiqlərinin davam etməsi ehtimalı fonunda AMB-nin ilin sonunadək faiz dərəcəsini daha 25 baza bəndi artırmasını gözləyirlər. Bununla belə, pul-kredit siyasəti ilə bağlı yekun qərarların iqtisadi göstəricilərdən asılı olacağı bildirilir.
Almaniya Bundesbankının rəhbəri və AMB İdarə Heyətinin üzvü Yoaxim Naqel pul-kredit siyasətinin əlavə sərtləşdirilməsinin zərurətə çevrilə biləcəyini istisna etməyib. O, qərarların hər iclasda mövcud statistik məlumatlar əsasında qəbul edilməsini dəstəkləyib. Olli Ren isə pul-kredit siyasətində əsas prioritetin qiymət sabitliyi olaraq qalacağını bildirib.
Laqard avronun beynəlxalq mövqeyinin gücləndirilməsi məsələsinə də toxunub. Onun sözlərinə görə, 30-dan çox mərkəzi bank Avrosistemin genişləndirilmiş repo əməliyyatları mexanizminə maraq göstərib.
Bu mexanizm beynəlxalq mərkəzi banklara likvidlik imkanları təqdim etməklə pul-kredit siyasətinin ötürülmə mexanizmini dəstəkləməyi və avronun qlobal ehtiyat valyutası kimi mövqeyini möhkəmləndirməyi hədəfləyir.
MONETAR.AZ
