Yaponiya Bankı bu gün keçirilən iclasında əsas faiz dərəcəsini gözləntilərə uyğun olaraq artırıb. Qərarın qəbulunda inflyasiyanın illik 2 faizlik hədəfə yaxınlaşması ilə bağlı narahatlıqlar əsas amillərdən biri olub.
Mərkəzi bank gecə ərzində faiz dərəcəsini 25 baza bəndi artıraraq 1,25 faizə çatdırıb. Bu, 1995-ci ildən bəri ən yüksək səviyyədir. Həmçinin bu qərar Yaponiya Bankının cari il ərzində həyata keçirdiyi ikinci faiz artımıdır.
Faiz dərəcələrini müəyyən edən İdarə Heyətinin doqquz üzvündən yeddisi artımın lehinə səs verib. Ayano Sato və Toiçiro Asada isə iqtisadi perspektivlərlə bağlı qeyri-müəyyənliyi əsas gətirərək faiz dərəcəsinin əvvəlki səviyyədə saxlanılmasını dəstəkləyiblər.
Yaponiya Bankı ölkə iqtisadiyyatının mülayim artım nümayiş etdirdiyini və bu dinamikanın davam edəcəyinin gözlənildiyini bildirib. Bununla yanaşı, Yaxın Şərqdəki vəziyyət və süni intellektə artan tələbat inflyasiya üçün əlavə risklər yaradır.
Mərkəzi bankın qiymətləndirməsinə görə, istehsalçı qiymətləri indeksindəki kəskin artım artıq istehlak qiymətlərinə təsir göstərməyə başlayıb. Bu proses baza inflyasiyasının da illik 2 faizlik hədəfə yaxınlaşmasına səbəb olur.
Tənzimləyici qurum inflyasiya və iqtisadi artım dinamikasını nəzərə alaraq faiz dərəcələrini artırmağa və uzun müddətdir davam edən yumşaq pul-kredit siyasətini mərhələli şəkildə sərtləşdirməyə davam edəcəyini açıqlayıb.
Bununla belə, Yaponiya Bankı ölkədə maliyyə şərtlərinin hələ də yumşaq olduğunu və yaxın perspektivdə bu vəziyyətin qorunacağını vurğulayıb.
Faiz qərarı avqust ayı üzrə istehlak qiymətləri indeksinin açıqlanmasından bir neçə saat sonra verilib. Son məlumatlar Yaponiyada inflyasiyanın sabit qaldığını və mərkəzi bankın müəyyən etdiyi illik 2 faizlik hədəfə yaxın səviyyədə olduğunu göstərib.
MONETAR.AZ
