Yaponiya lazım gəldiyi qədər yenin məzənnəsini müdafiə etməyə hazır olduğunu açıqlayıb və bu məsələ ilə bağlı ABŞ-la hər gün koordinasiya apardığını bəyan edib. Bu barədə ölkənin baş valyuta diplomatı Atsuşi Mimura danışıb. Məlumatı “Reuters” yayıb.
Mimura vurğulayıb ki, Tokio valyuta intervensiyalarının sayına məhdudiyyət görmür. Halbuki, BVF-nin tövsiyələrinə əsasən, altı ay ərzində üçdən çox intervensiya artıq bazara həddindən artıq müdaxilə kimi qiymətləndirilir. Onun sözlərinə görə, ABŞ tərəfi Yaponiyanın arqumentlərini və addımlarını “tam anlayır”, Tokio isə hələ də bazarda spekulyativ hərəkətlərin davam etdiyini hesab edir.
Bazarlarda gözləntilər artır ki, yen həm mümkün intervensiyalar, həm də Yaponiya Bankının faiz dərəcəsini artırmaq perspektivi səbəbindən Vaşinqton və Tokionun diqqət mərkəzində qalır. İnvestorlar Yaponiyanın məzənnəni təkbaşına dəstəkləyə bilib-bilməyəcəyini, yoxsa ABŞ-ın açıq dəstəyinə ehtiyac duyacağını anlamağa çalışırlar.
Xüsusi diqqət əvvəllər Yaponiyada faizlərin daha sürətli artırılmasını dəstəkləyən Skott Bessentə yönəlib.
“Reuters”in məlumatına görə, ötən həftə Yaponiya hakimiyyəti yenə dəstək vermək üçün təxminən 35 milyard dollar sataraq intervensiya həyata keçirib. Bundan sonra bazarda yapon valyutasında bir neçə kəskin sıçrayış müşahidə olunub və çərşənbə günü məzənnə bir dollar üçün 155 yenə qədər möhkəmlənib. Cümə axşamı isə yen qismən geri çəkilərək 156,13 səviyyəsində ticarət olunub.
Analitiklər hesab edirlər ki, yaxın vaxtlarda ABŞ-ın birbaşa birgə intervensiyalara qoşulması ehtimalı azdır. Mitsubishi UFJ Morgan Stanley Securities-in valyuta strateqi Şota Ryunun fikrincə, Vaşinqton yenin zəifləməsini daha çox spekulyasiyalarla deyil, Yaponiya Bankının siyasəti kifayət qədər sərtləşdirməməsi ilə əlaqələndirir. Buna görə də Bessent qeyri-rəsmi şəkildə Yaponiya Mərkəzi Bankını artıq iyunda faiz dərəcəsini artırmağa təşviq edə bilər.
Yaponiya Bankının daxilində də “şahin” mövqeli rəsmilərin sayı artır. Yaxın Şərqdəki münaqişə və idxalın bahalaşması səbəbindən inflyasiya risklərinin yüksəlməsi fonunda idarə heyətinin bəzi üzvləri artıq mart iclasında faizlərin daha tez artırılmasının tərəfdarı olublar.
Bu vəziyyət göstərir ki, zəif yen hökumət üçün getdikcə daha ciddi siyasi və iqtisadi problemə çevrilir. Çünki o, neftdən ərzağa qədər idxal mallarının qiymətini artırır və inflyasiya təzyiqini gücləndirir.
Bununla belə, ekspertlər xəbərdarlıq edirlər ki, intervensiya imkanları məhduddur. Yaponiya Bankının keçmiş əməkdaşı Atsuşi Takeuti bildirib ki, hakimiyyətin zəif yen trendini tam dəyişməsi çətin görünür. Onların əsas məqsədi daha çox ucuzlaşmanı ləngitmək və xarici amillərin yenin xeyrinə işləməsi üçün vaxt qazanmaqdır. Onun qiymətləndirməsinə görə, məzənnə yenidən psixoloji hədd sayılan dollar qarşısında 160 yen səviyyəsinə yaxınlaşarsa, Yaponiya yenidən bazara müdaxilə edə bilər.
MONETAR.AZ
