Təmir işləri ilə əlaqədar Bakının Suraxanı və Binəqədi rayonlarında nəqliyyat vasitələrinin hərəkətinə qismən və tam məhdudiyyət tətbiq olunacaq.
Monetar.az Azərbaycan Avtomobil Yolları Dövlət Agentliyindən verilən məlumata əsasən xəbər verir ki, Suraxanı rayonunun Hövsan qəsəbəsində Elvin Əlimov küçəsinin Ağadadaş Müniri küçəsi ilə kəsişməsindən 10-cu Hövsan küçəsi ilə kəsişməsinədək olan hissəsində oktyabrın 14-də saat 08:00-dan etibarən hərəkət qismən məhdudlaşdırılacaq.
Binəqədi şosesinin Mehdiabad yolu ilə kəsişməsindən Zəngəzur küçəsi ilə kəsişməsinədək olan hissəsində isə məhdudiyyətlər mərhələli şəkildə tətbiq ediləcək. Belə ki, oktyabrın 15-də saat 08:00-dan etibarən hərəkət qismən məhdudlaşdırılacaq, oktyabrın 16-da saat 23:00-dan başlayaraq isə tam məhdudiyyət qüvvəyə minəcək.
Sürücülərdən yollarda sıxlığın yaranmaması üçün əvvəlcədən alternativ marşrutlardan istifadə etmələri, hərəkət zamanı diqqətli olmaları və təmir işlərinə anlayışla yanaşmaları xahiş olunur.
