ABŞ Milli Avtomobil Yolları Hərəkətinin Təhlükəsizliyi İdarəsi (NHTSA) “Hyundai Motor America” şirkətinin ölkə ərazisində 94 622 avtomobili geri çağırdığını açıqlayıb. Qərar avtomobillərdə həm hərəkət zamanı, həm də mühərrik söndürüldükdən sonra yanğın baş verməsi riski ilə əlaqədardır.
Geri çağırma ön oturacaqların elektrik tənzimləmə sistemində yarana biləcək texniki nasazlıqla bağlıdır. İdarəetmə düyməsinin ilişib qalması elektrik mühərrikinin həddindən artıq qızmasına səbəb ola bilər. Bu isə naqillərin əriməsi və alışması riskini artırır.
Təhlükəsizlik tədbiri aşağıdakı modelləri əhatə edir:
-
2015–2016-cı illərdə istehsal olunmuş “Hyundai Genesis” sedanları;
-
2017–2020-ci illərdə istehsal olunmuş “Genesis G80” sedanları.
NHTSA və “Hyundai” avtomobil sahiblərinə nasazlıq aradan qaldırılanadək nəqliyyat vasitələrini qapalı qarajlarda saxlamamağı tövsiyə edir. Avtomobillər açıq havada, digər nəqliyyat vasitələrindən və tikililərdən uzaqda park edilməlidir.
Şirkət bildirir ki, nasazlığın aradan qaldırılması üçün texniki həll üzərində işlər davam edir. Təmir proseduru hazırlandıqdan sonra avtomobil sahiblərinə rəsmi bildirişlər göndəriləcək.
Geri çağırma çərçivəsində nəzərdə tutulan təmir işlərinin avtomobil sahibləri üçün ödənişsiz həyata keçirilməsi planlaşdırılır.
MONETAR.AZ
