Çində Aistaland (yerli bazarda Qijing) avtomobil brendi təqdim olunub. Brend GAC Group və Huawei şirkətinin birgə əməkdaşlığı ilə yaradılıb. İlk model kimi idman üslublu universall Aistaland GT7 satışa çıxarılıb, ön sifarişlər artıq qəbul edilir, lakin qiymətlər hələ açıqlanmayıb. Aistaland yaxın üç ildə bir neçə yeni model təqdim etməyi planlaşdırır, 2026-cı ilin sonuna orta və iri ölçülü SUV modellərinin debütü gözlənilir.
Dizayn və ölçülər:
Aistaland GT7 shooting brake üslubunda hazırlanıb və xarici görünüşcə Porsche Panamera universallarını xatırladır. Uzunluğu 5050 mm, təkər bazası 3000 mm-dir. Baş işıqlandırmada Huawei XPixel texnologiyası və rəqəmsal proyeksiya, fara və arxa işıqlarda isə asistentin işini göstərən mavi LED-lər istifadə olunub. Qapı tutacaqları yarı-gizli dizayndadır. Qara, parlaq 19 düymlük disklər və qırmızı əyləc kaliperləri quraşdırılıb. Bədənin rəngləri kurort adları ilə adlandırılıb: qırmızı “Monako”, narıncı “Sitsiliya”, lavanda “Provan”, mavi “Nitsa”.
Salon və komfort:
Minimalist üslubda dizayn edilmiş salon rəqəmsal panel və HarmonyOS əsaslı böyük sensor ekranlı media sistemi ilə təchiz olunub. Huawei Xiaoyi səs köməkçisi dəstəklənir, Huawei Sound AI səs sistemi isə 9 dinamikdən ibarətdir. Yumşaq materiallar və alüminium əlavələr salonu bəzəyir. Ön oturacaqlar idman profilli, isitmə, ventilyasiya və yaddaş funksiyasına malikdir. İki zonalı iqlim sistemi, sükan isitməsi, simsiz şarj və çoxrəngli ambient işıqlandırma mövcuddur.
Texnologiya və süni intellekt:
Yeni modeldə süni intellekt əsaslı texnologiyalar geniş tətbiq olunub. Brend adı AI start new land (“Süni intellekt yeni üfüqləri açır”) mənasını verir. Güc qurğusu üç elektrik mühərrikdən ibarətdir, Huawei XMC şassi-kontrolleri hər təkərin fırlanma momentini millisaniyə intervalında tənzimləyir. CATL ilə birgə hazırlanan yeni nəsil 800 V Qilin batareyası 6C sürətli şarjı dəstəkləyir – bu, “bir saniyədə bir kilometr” sürətində enerji doldurma imkanı verir.
Avtonom sürücülük sistemləri üçün 896-sətirli lidar quraşdırılıb, avtomobil 3-cü səviyyəli avtonom sürücülük dəstəyinə malikdir. Bütün sistemlər müntəzəm olaraq uzaqdan yenilənir və neyron şəbəkə əsaslı süni intellektlə idarə olunur.
MONETAR.AZ
