Enerji şirkəti Shell bildirib ki, dünyada maye təbii qaza (LNG) tələbatın 2025-ci ildəki 422 milyon ton səviyyəsindən 2050-ci ilə qədər 610–780 milyon ton aralığına yüksələcəyi gözlənilir.
Şirkətin məlumatına görə, bu, 25 il ərzində təxminən 45–85% artım deməkdir.
Shell qeyd edib ki, 2050-ci il üçün proqnozlaşdırılan tələbatın hətta aşağı həddini belə qarşılamaq üçün 2030 və 2040-cı illərdə LNG təklifinin artırılması məqsədilə əlavə investisiyalar tələb olunacaq.
Şirkət həmçinin bildirib ki, mövcud LNG istehsal zavodları və planlaşdırılan yeni layihələr sənaye üzrə xərclər əyrisinin aşağı yarısında yerləşdiyindən rəqabət baxımından əlverişli mövqedədir.
Shell-in proqnozuna görə, 2040-cı ilə qədər LNG-yə tələbatın artımının əsas hissəsi Asiyanın payına düşəcək və ümumi artımın təxminən 70%-i bu regionun hesabına formalaşacaq.
Hazırda LNG dünya üzrə təbii qaz təklifinin təxminən 14%-ni, qlobal ilkin enerji təminatının isə 3%-dən bir qədər çoxunu təşkil edir. Shell hesab edir ki, bu göstərici 2040-cı ilə qədər 4%-dən yuxarı qalxacaq və 2050-ci ildə də bu səviyyədə qalacaq.
MONETAR.AZ
