Qlobal miqyasda benzin qiymətlərinin kəskin artması fonunda elektrik nəqliyyatına maraq yenidən güclənir. Bloomberg-in məlumatına görə, elektromobillər artıq dünya enerji bazarına ciddi təsir göstərir.
Analitiklərin modelləşdirməsinə əsasən, elektromobillərin sürətlə yayılması nəticəsində 2025-ci ilin yekununda gündəlik 2,3 milyon barel neft istehlakının qarşısı alınıb.
Tədqiqatın müəlliflərindən olan neft analitiki Claudio Lubis bildirir ki, bu qənaət göstəricisi onilliyin sonuna qədər davamlı şəkildə artacaq. Proqnozlara görə, 2030-cu ilə qədər qənaət olunan neft həcmi iki dəfədən çox artaraq 5,25 milyon barel/gün səviyyəsinə çata bilər.
Hazırda qənaətin əsas hissəsi iki və üç təkərli elektrik nəqliyyat vasitələrinin, xüsusilə inkişaf etməkdə olan ölkələrdə sürətlə yayılan elektrik motosiklet və mopedlərin payına düşür. Lakin yaxın illərdə tam ölçülü elektromobillərin geniş yayılması ilə əsas təsirin məhz bu seqmentdən gələcəyi gözlənilir.
Elektromobillərin iqtisadi təsiri də nəzərəçarpandır:
Çin ildə 28 milyard dollardan çox neft idxalına qənaət edir,
Avropa üçün bu rəqəm təxminən 8 milyard dollardır,
Hindistan isə ildə 600 milyon dollar qənaət edir.
Əvvəllər elektromobil satışlarının artım tempinin zəifləyəcəyi gözlənilirdi. Buna Çində subsidiyaların azaldılması, Avropada daxili yanma mühərriklərinin qadağası ilə bağlı planların yumşaldılması və ABŞ-da iqlim siyasətinin dəyişməsi səbəb olmuşdu. Lakin yanacaq qiymətlərinin yenidən artması istehlakçı marağını gücləndirib.
Hazırda elektromobillər artıq 39 ölkədə ümumi satışların 10%-dən çoxunu təşkil edir. Müqayisə üçün, 2019-cu ildə bu göstərici cəmi 4 ölkədə müşahidə olunurdu.
Asiya ölkələri “yaşıl” nəqliyyatın tətbiqində liderlik edir:
Çində elektromobillərin satış payı ilk dəfə 50%-i keçib,
Vyetnamda bu göstərici 38%,
Tailandda isə 21% təşkil edir.
Bu tendensiya artıq regionda neftə tələbatın artım tempinin real şəkildə zəifləməsinə səbəb olur.
MONETAR.AZ
