İqtisadi qeyri-sabitlik fonunda qızıl uzunmüddətli investisiyalar üçün ən çox seçilən alətlərdən biri olaraq qalır. Mütəxəssislər bildirirlər ki, qızıla yatırım etməzdən əvvəl uyğun formatın seçilməsi vacibdir, çünki hər üsulun öz üstünlükləri və riskləri mövcuddur.
İnvestorlar üçün əsas dörd istiqamət fərqləndirilir. Birinci variant fiziki qızıl – külçələrin alınmasıdır. Bu üsul aktivlər üzərində tam nəzarət imkanı versə də, saxlanma və təhlükəsizlik xərcləri tələb edir. Zinət əşyaları isə investisiya məqsədilə məqsədəuyğun hesab edilmir, çünki satış zamanı dəyər itkisi yüksək olur.
İkinci üsul investisiya məqsədli qızıl sikkələrin alınmasıdır. Bu sikkələr əsasən banklar və iri dilerlər tərəfindən təklif olunur. Kolleksiya sikkələrindən fərqli olaraq, investisiya sikkələrinin qiyməti əsasən qızılın bazar dəyərinə bağlıdır.
Üçüncü seçim fiziki qızıl saxlamadan investisiya etməyə imkan verən adsız metal hesablarıdır. Bu formatda vəsait qramla ifadə olunur, alqı-satqı isə onlayn rejimdə həyata keçirilir. Mütəxəssislər bu üsulu kiçik məbləğlə investisiyaya başlamaq istəyənlər üçün daha əlverişli hesab edirlər.
Dördüncü variant qızıl ilə əlaqəli birja alətlərinə investisiyadır. Bunlara qızıl hasil edən şirkətlərin səhmləri, birja investisiya fondları və fyuçerslər daxildir. Bu alətlər potensial olaraq daha yüksək gəlir versə də, bazar dəyişkənliyi səbəbindən risklər də yüksəkdir.
Analitiklərin fikrincə, qızılın əsas üstünlükləri portfelin şaxələndirilməsi, inflyasiyadan qoruyucu rol oynaması və uzunmüddətli dövrdə dəyərini qorumasıdır. Bununla yanaşı, qızılın passiv gəlir yaratmaması və bəzi formatlarda əlavə xərclər tələb etməsi əsas çatışmazlıqlar kimi göstərilir.
Qeyd olunur ki, qızıla investisiya qərarı verərkən investorlar öz maliyyə məqsədlərini, riskə dözümlülüyünü və investisiya müddətini nəzərə almalıdırlar.
Monetar.az
