Yaxın Şərqdəki geosiyasi gərginlik və Hörmüz boğazının blokadası fonunda regionun əsas enerji oyunçuları böhran sonrası fəaliyyət planlarını açıqlamağa davam edir. Küveytin dövlət neft şirkəti olan Kuwait Petroleum Corporation (KPC), Hörmüz boğazının naviqasiyaya yenidən açılacağı təqdirdə hasilat tempini necə bərpa edəcəyinə dair konkret qrafik müəyyənləşdirib.
Londonda keçirilən və qlobal enerji elitasını bir araya gətirən S&P Global Energy Middle East Petroleum and Gas Conference çərçivəsində çıxış edən KPC-nin beynəlxalq marketinq bölməsinin idarəedici direktoru Şeyx Xalid Əhməd Əl-Sabah, hasilatın və neft emalının mərhələli şəkildə bərpa olunacağını bəyan edib.
Onun sözlərinə görə, hasilat güclərinin qalan 30%-nin tam bərpası üçün əlavə olaraq təxminən bir ay vaxt tələb olunacaq.
“Normal hasilat səviyyəsinin 70%-nə 6–8 həftə ərzində qayıtmaq mümkündür. Qalan 30%-in bərpası üçün isə daha bir ay lazım olacaq”, – deyə Əl-Sabah qeyd edib.
Hasilat sektorundan fərqli olaraq, Küveytin daxili neft emalı müəssisələrində (refineries) bərpa prosesi daha sürətli baş tutacaq. KPC rəsmisinin qiymətləndirməsinə görə, ölkədəki neft emalı zavodları böhran tam başa çatdıqdan sonra cəmi 2–3 həftə ərzində öz əvvəlki istehsal güclərinə çata biləcək. Bu operativlik daxili və regional yanacaq tələbatının sürətlə optimallaşdırılmasına imkan verəcək.
Küveyt tərəfindən elan edilən bu qrafik bir neçə gün əvvəl Vyanada keçirilən OPEC texniki iclasında S&P Global, Kpler və Energy Aspects kimi nüfuzlu analitik mərkəzlərin səsləndirdiyi "Hörmüz böhranının fəsadları ilin sonuna qədər aradan qalxmayacaq" tezisini növbəti dəfə təsdiqləyir.
Su yolunun fiziki olaraq açılması qlobal bazarlara dərhal böhrandan əvvəlki həcmdə xam neft axacağı mənasına gəlmir. Regionun ən böyük istehsalçılarından biri olan Küveytin tam reabilitasiyası üçün ən azı rüblük (3 aylıq) zaman kəsiyinin tələb olunması, neft tədarükündəki qlobal qıtlığın və qiymətlərdəki risk mükafatının bir müddət də qüvvədə qalacağını göstərir.
MONETAR.AZ
