İran Hörmüz boğazından keçən gəmilər üçün ödəniş tətbiq olunarsa, illik gəlirin təxminən 64 milyard dollar ola biləcəyini açıqlayıb. Bu barədə İran dövlət televiziya şirkətinin sədr müavini Hasan Abedini bildirib.
Onun sözlərinə görə, Hörmüz boğazı İranın “rasional idarəçiliyi altında olan bir dəhlizə” çevrilib. Ötən il bu boğazdan 32 min gəmi keçib və hər gəmidən 2 milyon dollar ödəniş tutulsa, ümumi gəlir 64 milyard dollara çata bilər.
Xatırladaq ki, ABŞ prezidenti Donald Trump aprelin 7-də Pakistanın baş naziri Shehbaz Sharif-in təklifi əsasında İranla iki həftəlik qarşılıqlı atəşkəs elan etdiyini bildirib. Bu razılaşma Hörmüz boğazının tam və təhlükəsiz şəkildə açılması şərti ilə əldə olunub.
İran televiziyasının məlumatına görə, Tehran atəşkəs üçün 10 şərt irəli sürüb. Bunlara qarşılıqlı hücumların dayandırılması prinsipi, Hörmüz boğazı üzərində nəzarət, uranın zənginləşdirilməsi hüququ, sanksiyaların ləğvi, kompensasiya ödənişi və ABŞ qüvvələrinin regiondan çıxarılması daxildir.
