İsveç Mərkəzi Bankı (Riksbank) faiz dərəcəsini gözləntilərə uyğun olaraq 1,75 faiz səviyyəsində saxlayıb. Bununla belə, bank faiz dərəcəsinin gələcək trayektoriyasına dair proqnozunu dəyişərək ilin sonuna qədər artım ehtimalına işarə edib.
Yenilənmiş proqnozlara əsasən, noyabr ayında faiz dərəcəsinin 25 baza bəndi artırılması ehtimalı təxminən 50 faiz qiymətləndirilir. Dekabr iclasında isə faiz artımı ehtimalının daha yüksək olduğu bildirilir.
Riksbank 2027-ci il üçün faiz dərəcəsi ilə bağlı proqnozlarını da yuxarı istiqamətdə yeniləyib. Bank gələn il təxminən 1,5 faiz artımı nəzərdə tutur. 2027-ci ilin dördüncü rübündə faiz dərəcəsinin 2,42 faizə çatacağı proqnozlaşdırılır. Əvvəlki proqnozda bu göstərici 2,07 faiz təşkil edirdi.
Riksbankın açıqlamasında İsveç iqtisadiyyatında hələ də istifadə olunmamış potensialın mövcud olduğu vurğulanıb. Bankın qiymətləndirməsinə görə, inflyasiyanı azaldan fiskal tədbirlər nəzərə alınmadıqda, baza inflyasiyasının proqnoz dövrünün böyük hissəsində 2 faiz ətrafında qalması gözlənilir.
2026-cı il üzrə ÜDM artımı proqnozu da yuxarı istiqamətdə yenilənib. Bununla belə, Riksbank iqtisadi artımdakı yaxşılaşmanın müəyyən hissəsini müvəqqəti amillərlə əlaqələndirib.
Baza istehlak qiymətləri indeksi (CPIF) üzrə inflyasiyanın 2026-cı ildə 0,8 faiz, 2027-ci ildə isə 2 faiz təşkil edəcəyi proqnozlaşdırılır. Hər iki göstərici əvvəlki proqnozla müqayisədə dəyişməz saxlanılıb.
“Citi” analitiklərinin fikrincə, sentyabr ayı üzrə istehlak qiymətləri göstəricisi və ya qarşıdakı altı həftə ərzində əmək bazarı ilə bağlı məlumatlar əhəmiyyətli dərəcədə yaxşılaşmasa, faiz dərəcəsinin noyabr iclasında deyil, dekabrda artırılması daha real ssenari kimi görünür.
MONETAR.AZ
