Çin Ay təqvimi üzrə Yeni ili böyük canlanma ilə qarşılamağa ümid edir. Bu ənənəvi bayram münasibətilə isə dünyada ən irimiqyaslı miqrasiya artıq başlayıb. At ili nikbinlik və yeni imkanların rəmzi sayılır və Çin hakimiyyəti ümid edir ki, bu il verilən əlavə istirahət günləri iqtisadiyyata təkan verəcək.
The Guardian yazır ki, Çin rəsmiləri bu il Ay Yeni ili ilə bağlı əlavə tətillərin ölkə iqtisadiyyatına impuls verəcəyinə inanırlar. Çünki qarşıdakı il üçün əsas prioritet kimi daxili istehlakın artırılması müəyyən edilib.
Hökumətin gözləntilərinə görə, 40 günlük bayram dövründə Çin üzrə rekord səviyyədə — 9,5 milyard sərnişin səfəri həyata keçiriləcək. Bu, ötən ildə qeydə alınan 9 milyard səfərlə müqayisədə daha çoxdur. Yüz milyonlarla insan Çin Yeni ilini ailəsi ilə qeyd etmək üçün ölkə daxilində səyahət edəcək.
Çin 2023-cü ildə dünyanın ən çox əhalisi olan ölkəsi statusunu Hindistana versə də, illik “çunyun”, yəni “bahar köçü” hələ də dünyada insanların ən böyük kütləvi miqrasiyası olaraq qalır. The Guardian qeyd edir.
Bu il Ay təqvimi üzrə rəsmi Yeni il tətili adətən olduğu kimi səkkiz deyil, doqquz gün davam edəcək. Bu da insanlara bayram dövründə paylanan “xunbao” — qırmızı zərflərdə pul hədiyyələrini xərcləmək üçün daha çox vaxt verir. Bayram müddəti 15–23 fevral tarixlərini əhatə edir, Çin Yeni ilinin birinci günü isə 17 fevrala təsadüf edir.
Çin, çevrilmə və yenilənməni simvolizə edən İlan ilindən sonra, nikbinlik və yeni imkanların rəmzi sayılan At ilinə qədəm qoyur.
Bu yaxınlarda Tsyansu əyalətinin təbliğat departamenti tərəfindən dərc olunan məqalədə hökumətin bayram dövrü ilə bağlı gözləntiləri belə izah edilir: “Bayram günlərində keçirilən Bahar festivalı mədəniyyət və turizm tədbirləri daxili tələbin canlanmasına töhfə verir”. Məqalədə qeyd olunur ki, bayram “Çin iqtisadiyyatını irəli aparan coşqun həyat enerjisini azad etməyə” kömək edəcək. Burada sözün əsl mənasında “on min atın irəli doğru çapması” mənasını verən bir ifadə işlədilir.
Bu astrologiya rəmzini real iqtisadi dəstəyə çevirmək üçün Çin mərkəzi hökuməti fevral ayında ümumi dəyəri 360 milyon yuandan (təxminən 52 milyon dollar) çox olan istehlak vauçerləri buraxacağını bildirib.
Oksford Universitetinin Çin Mərkəzinin elmi əməkdaşı Corc Maqnusun sözlərinə görə, “Ay Yeni ili pərakəndə satıcılar və istehlak xidmətləri göstərənlər üçün böyük fayda gətirir, əks halda fevral onlar üçün olduqca sakit keçə bilərdi”.
Lakin makroiqtisadi səviyyədə Çin iqtisadiyyatı hələ də bir problemlə üzləşir: Çin ailələri gəlirlərinin qeyri-adi dərəcədə böyük hissəsini, təxminən üçdə birini yığıma yönəldir. Bu şəraitdə ÜDM artımı əsasən ixrac hesabına təmin olunur.
Nəşrin qeyd etdiyinə görə, ötən il Çində pərakəndə satışlar (istehlak xərclərinin göstəricisi) 3,7% artıb ki, bu da ümumi ÜDM artım tempi olan 5%-dən aşağıdır. Daxili tələbin artırılması mart ayında parlament tərəfindən təsdiqlənəcək növbəti beşillik iqtisadi planın əsas prioritetlərindən biri olacaq. Kommunist Partiyası artıq “istehlakın qətiyyətlə artırılmasına” fokuslanacağını bəyan edib.
Yanvar ayında Milli İnkişaf və İslahatlar Komissiyası qarşıdakı beş il üçün daxili tələbin artırılmasına dair fəaliyyət planı hazırlayacağını açıqlayıb.
Böyük potensialın olduğu sahələrdən biri xidmət sektorudur. Yaşlılara qulluq, əyləncə və səhiyyə kimi istiqamətlər ötən il 5,5% artım göstərib. Bu sahələr istehlak malları ilə müqayisədə hələ kifayət qədər inkişaf etmədiyindən, burada daha geniş artım imkanları mövcuddur.
Qısa müddətlik diqqət çəkən xidmətlərdən biri UU Paotui çatdırılma platforması tərəfindən təklif olunub. Kuryer xidməti bu yaxınlarda “etibarnamə ilə Çin Yeni ili ziyarəti” adlı məhsul təqdim edib. 999 yuan (təxminən 145 dollar) qarşılığında istifadəçi yaşlı qohumlarını ziyarət etmək, valideynlər qarşısında edilən ənənəvi ehtiram rituallarını yerinə yetirmək və görüşü canlı yayımla müştəriyə göstərmək üçün birini göndərə bilirdi. Lakin ənənələrin dəyərdən düşməsi ilə bağlı etirazlardan sonra şirkət bu xidmətdən imtina edib, The Guardian yazır.
