Azərbaycanda insan hüquqlarının qorunması sahəsində vətəndaş müraciətlərinin təhlili göstərir ki, sosial təminat, əmək, səhiyyə, mənzil və təhsil hüquqları ilə bağlı məsələlər aktuallığını qoruyur.
Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın İnsan Hüquqları Gününə həsr olunmuş məqaləsində bildirilir ki, Ombudsman təsisatına daxil olan müraciətlər cəmiyyətdə insan hüquqları sahəsində mövcud vəziyyətin və vətəndaşların gözləntilərinin qiymətləndirilməsi baxımından mühüm məlumat mənbəyidir.
Ombudsmanın sözlərinə görə, sosial təminatla bağlı müraciətlərdə əsasən ünvanlı dövlət sosial yardımının təyin edilməsi, özünüməşğulluq proqramlarına cəlb olunma, pensiya və sosial müavinətlərin təyin və ya yenidən hesablanması məsələləri üstünlük təşkil edir.
Səbinə Əliyeva qeyd edib ki, əmək hüquqları sahəsində vətəndaşlar daha çox əməkhaqlarının və son haqq-hesabın vaxtında ödənilməməsi, əmək müqavilələrinə xitam verilərkən qanunvericiliyin tələblərinə əməl olunmaması ilə bağlı müraciətlər edirlər.
Müvəkkilin fikrincə, son illər həyata keçirilən sosial-iqtisadi islahatlar, dövlət xidmətlərinin rəqəmsallaşdırılması, eləcə də sosial müdafiə sisteminin gücləndirilməsi vətəndaşların hüquqlarının daha effektiv təmin olunmasına şərait yaradıb. O, xüsusilə həssas əhali qruplarının – şəhid ailələrinin, müharibə veteranlarının, əlilliyi olan şəxslərin, qaçqın və məcburi köçkünlərin sosial müdafiəsinin dövlət siyasətinin əsas prioritetlərindən biri olduğunu vurğulayıb.
Səbinə Əliyeva bildirib ki, vətəndaşların sosial hüquqlar, keyfiyyətli xidmətlərə çıxış və şəffaf idarəetmə ilə bağlı gözləntilərinin artması dövlət qurumlarının fəaliyyətində çevik və insan yönümlü yanaşmanın daha da gücləndirilməsini zəruri edir.
