ABŞ fond bazarında satış təzyiqi güclənib. Amazon, Intel və Alphabet şirkətlərinin rüblük nəticələri ilə bağlı investor narahatlıqları, eləcə də Binance kriptovalyuta birjasında baş verdiyi bildirilən genişmiqyaslı kiberhücum qlobal maliyyə bazarlarında riskdən yayınma meylini artırıb.
Bu gün Asiya və Avropa ticarət sessiyalarında ABŞ fond indekslərinin fyuçersləri əsasən mənfi dinamika nümayiş etdirib. Bakı vaxtı ilə saat 09:13-ə olan məlumata görə, Nasdaq 100 fyuçersləri 1,82% azalaraq 28 866,90 bəndə, S&P 500 fyuçersləri 0,87% geriləyərək 7 652,90 bəndə düşüb.
Dow Jones fyuçersləri 0,15% azalaraq 52 262,10 bənd təşkil edib. Russell 2000 fyuçersləri 0,30% ucuzlaşıb. Bazarlardakı narahatlığın artması ilə VIX volatillik indeksinin fyuçersləri isə 5,67% yüksələrək 19,18 bəndə çatıb.
Əvvəlki ticarət sessiyasında da ABŞ fond bazarının əsas indeksləri enişlə bağlanmışdı. Nasdaq Composite 1,38% azalaraq 26 184,72 bəndə, S&P 500 0,30% geriləyərək 7 720,39 bəndə, Dow Jones isə 0,25% düşərək 52 342,56 bəndə enmişdi. Bunun əksinə, kiçik kapitallaşmalı şirkətləri əhatə edən Russell 2000 indeksi 1,01% yüksəlmişdi.
Texnologiya sektorunda kütləvi satışlar DJ Technology indeksinin 2,11% azalmasına səbəb olub. Bununla belə, S&P 500 daxilində səhmləri bahalaşan şirkətlərin sayı ucuzlaşanlardan xeyli çox olub: 402 şirkətin səhmləri artdığı halda, 84 şirkətin səhmləri dəyər itirib.
Kapital axınının səhiyyə və maliyyə sektorlarına yönəldiyi müşahidə olunub. DJ Health Care indeksi 2,32%, DJ Financials indeksi isə 1,65% yüksəlib.
Texnologiya nəhənglərinin maliyyə nəticələri və gələcək dövrlər üçün proqnozları bazarda satışların əsas səbəbləri sırasında göstərilir.
Alphabet şirkətinin səhmləri üçüncü rüb hesabatından sonra 12%-dən çox ucuzlaşıb. Gəlirin gözləntilərdən aşağı qalması, sərbəst pul axını ilə bağlı narahatlıqlar və süni intellektə yatırılan vəsaitlərin gəlirliliyi investorların ehtiyatlı mövqeyini gücləndirib.
Amazon səhmləri əsas ticarət sessiyasını 4,25% itki ilə 243,79 dollarda başa vurub. Hesabatın açıqlanmasından sonra post-bazar əməliyyatlarında ucuzlaşma 10%-ə çatıb. Şirkət 2026-cı il üzrə kapital xərcləri planını 220 milyard dollar səviyyəsində saxlayıb. Son 12 ay üzrə sərbəst pul axınının isə mənfi 42,4 milyard dollara düşdüyü bildirilir.
Intel səhmləri hesabatdan sonra post-bazar ticarətində 17% ucuzlaşıb. Şirkət dördüncü rüb üzrə gəlirini analitiklərin 17 milyard dollarlıq gözləntisinə qarşı 15–16 milyard dollar aralığında proqnozlaşdırıb. Bu gözləntilərin aşağı salınması fərdi kompüter satışlarındakı zəifləmə ilə əlaqələndirilib.
Texnologiya sektorundakı satışlar digər şirkətlərin səhmlərinə də təsirsiz ötüşməyib. Xüsusilə proqram təminatı və sənaye sahələrində ciddi ucuzlaşmalar qeydə alınıb.
-
ServiceNow – 26,95% ucuzlaşaraq 109,67 dollara;
-
Fortinet – illik xidmət gəlirləri proqnozunun aşağı salınmasından sonra 20,09% azalaraq 139,10 dollara;
-
Caterpillar – dördüncü rüb üzrə mülayim proqnoz fonunda 9,25% geriləyərək 647,39 dollara;
-
Xerox – 40,50% azalaraq 1,67 dollara;
-
Sprouts Farmers Market – 22,58% ucuzlaşaraq 48 dollara düşüb.
NVIDIA səhmləri də 0,80% dəyər itirərək 213,66 dollar səviyyəsində qərarlaşıb. The New York Times qəzetinin məlumatına görə, ABŞ kəşfiyyatı Megaspeed şirkətinin rəhbəri Elis Huanqı (Alice Huang) Çin kəşfiyyatının agenti hesab edir. NVIDIA isə Jensen Huanqın həmin şəxslə əlaqələrinin adi biznes münasibətləri çərçivəsində olduğunu bildirib.
Bununla yanaşı, bəzi şirkətlərin səhmləri bazarın ümumi mənfi tendensiyasına qarşı yüksəlib. ADT 33,20%, Crocs 25,54%, Carvana isə 15,68% bahalaşıb.
Fond bazarındakı gərginliyi artıran digər əsas hadisə Binance kriptovalyuta birjası ilə bağlı kiberhücum xəbərləridir. Təqdim edilən məlumatlara əsasən, birja hadisə nəticəsində ümumi zərər qiymətləndirməsini 6,3 milyard dollara yüksəldib.
Binance-in açıqlamasına görə, hücum şirkət əməkdaşlarından birinin komprometasiya olunmuş noutbuku vasitəsilə həyata keçirilib. Bu müdaxilənin vəsaitlərin mənimsənilməsinə şərait yaratdığı bildirilir.
Təhlükəsizlik insidentindən sonra birjada depozit və vəsait çıxarılması əməliyyatları müvəqqəti dayandırılıb. Oğurlanmış aktivlərin təxminən 3 milyard dollarlıq hissəsinin dondurulduğu qeyd olunur.
Texnologiya şirkətlərinin maliyyə nəticələri ilə bağlı narahatlıqlar və Binance ətrafında yaranan təhlükəsizlik böhranı bazarlarda qeyri-müəyyənliyi artırıb. Nasdaq fyuçerslərinin digər əsas indekslərlə müqayisədə daha kəskin geriləməsi texnologiya sektorunun satış təzyiqinə xüsusilə həssas olduğunu göstərir.
MONETAR.AZ
