Qlobal əlvan və qara metal bazarları ABŞ ilə İran arasındakı ziddiyyətli bəyanatlar və geosiyasi gərginlik fonunda qeyri-müəyyən dövrünü yaşayır. Bloomberg agentliyinin məlumatına görə, ABŞ Prezidenti Donald Trampın Tehranla danışıqlarda son mərhələyə keçildiyini elan etməsi bazarlara qısamüddətli nikbinlik gətirsə də, tərəflərin dərhal ardınca bir-birini hərbi güclə təhdid etməsi qiymətləri dar koridora (dar diapazona) sıxışdırıb.
İnvestorların ABŞ dollarının cüzi möhkəmlənməsinə reaksiya verməsi də metalların qiymətinə əlavə təzyiq yaradıb. Bu gedişat sənayenin əsas barometri sayılan mis və poladın xammalı olan dəmir filizinin qiymətlərində fərqli dinamika ilə özünü göstərir.
Tramp bəyan edib ki, əgər sülh şərtləri imzalanmasa, ABŞ ordusu yaxın günlərdə hərbi zərbələri bərpa edə bilər. Tehran isə cavabında hər hansı bir hücumun qarşılığının yerli çərçivədə qalmayacağını və reaksiyanın bütün Yaxın Şərq sərhədlərini aşacağını bildirib.
Bu ritorika fonunda misin üfüqi hərəkəti onun fundamental olaraq güclü qalması ilə izah olunur. Ötən həftə tarixi maksimumunu (rekord həddini) yeniləyən mis hazırda üç əsas qlobal amil hesabına dəstəklənir:
-
Süni İntellekt bumu: Data mərkəzlərinin (data centers) və super-kompüterlərin elektrik şəbəkələri üçün nəhəng həcmdə mis naqillərə ehtiyac var.
-
"Yaşıl" keçid: Elektromobillər və bərpa olunan enerji infrastrukturu ənənəvi sənayeyə nisbətən dörd dəfə çox mis tələb edir.
-
Strateji ehtiyatlar: Dünyanın aparıcı gücləri tədarük zənciri qopmalarına qarşı mis anbarlarını doldurmağa üstünlük verirlər.
Mis geosiyasi gərginlik sayəsində mövqeyini qorusa da, polad sənayesinin əsas elementi olan dəmir filizi Sinqapur birjasında ardıcıl altıncı sessiyadır ki, ucuzlaşır.
Chaos Ternary Futures analitiklərinin hesabatına görə, bu geriləmənin arxasında iki mühüm səbəb dayanır: bir tərəfdən qlobal dəniz tədarükünün (ixracatın) artması xammal bolluğu yaradır, digər tərəfdən isə yay mövsümü öncəsi Çinin daxili bazarında polad satışları və tikinti aktivliyi zəifləyir. Ekspertlər qısamüddətli perspektivdə dəmir filizinin tonunun 100 dollar psixoloji həddinə doğru enməkdə davam edəcəyini proqnozlaşdırırlar.
MONETAR.AZ
