Qızılın qiyməti bugün Asiya ticarət sessiyası zamanı artım nümayiş etdirərək son günlərin müsbət dinamikasını qoruyub saxlayıb. Bu bahalaşmanın arxasında həm qlobal geosiyasi xəbərlər, həm də istiqraz bazarındakı hərəkətlilik dayanır. Analitiklər qiymət artımını ABŞ ilə İran arasında regional gərginliyi azalda biləcək mümkün sülh və ya atəşkəs razılaşmasına dair bazarda yaranan ümidlərlə əlaqələndirirlər.
Bundan əlavə, ötən həftə qızılın bir qədər ucuzlaşması uzunmüddətli investorlar üçün əlverişli alış fürsətinə (bazar dilində desək, "ucuzlaşmadan alış") çevrilib. İstiqraz bazarında kəskin satış dalğasından sonra vəziyyətin nisbətən sabitləşməsi də qiymətli metalın mövqeyini gücləndirib.
Spot qızılın qiyməti Bakı vaxtı ilə saat 05:56-ya olan məlumata görə 0,4 faiz artaraq bir unsiya üçün 4 560,92 dollara çatıb. Qızıl fyuçersləri isə 0,3 faiz yüksələrək bir unsiya üçün 4 562,50 dollar olub.
Adətən geosiyasi sabitlik "təhlükəsiz liman" aktivlərinə (qızıla) tələbi azaltsa da, inflyasiya gözləntilərinin səngiməsi və ABŞ dövlət istiqrazlarının gəlirliliyindəki tarazlıq bu dəfə qızılın qiymətini yuxarı tərəfə itələyib.
MONETAR.AZ
