ABŞ dolları Federal Ehtiyat Sisteminin (FED) bu həftəki faiz qərarı ərəfəsində möhkəmlənib, Yaponiya yeni isə Yaponiya Bankının faiz dərəcəsini artıracağı gözləntiləri zamanı yeddi aylıq maksimumundan geri çəkilməyə davam edib.
Dollar indeksi neft qiymətlərinin və ABŞ xəzinədarlıq istiqrazlarının gəlirliliyinin yüksəlməsi fonunda 0,12 faiz artaraq 99,60 səviyyəsinə çatıb. EUR/USD cütlüyü 0,11 faiz azalaraq 1,1537-yə, GBP/USD isə 0,12 faiz geriləyərək 1,3485-ə düşüb.
USD/JPY cütlüyü 0,24 faiz artaraq 154,70 səviyyəsinə yüksəlib. Bununla da yen ötən həftə qeydə aldığı 152,89 səviyyəsindəki yeddi aylıq maksimumdan daha da uzaqlaşıb.
Bazarlar Yaponiya Bankının cümə günü faiz dərəcəsini 25 baza bəndi artıracağını böyük ölçüdə qiymətlərə daxil edib. Bu səbəbdən investorların diqqəti artıq qərarın özündən çox, Yaponiya Bankının gələcək faiz artımlarının tempi ilə bağlı verəcəyi siqnallara yönəlib.
FED-in çərşənbə günü faiz dərəcəsini artıracağı gözləntisi də bazarlarda güclənib. “CME FedWatch” məlumatlarına görə, faiz artımı ehtimalı təxminən 93 faiz qiymətləndirilir. Bu, ABŞ-də son üç ildən artıq müddətdə faiz dərəcəsinin ilk yüksəlişi ola bilər.
Bununla belə, qərarın böyük ölçüdə əvvəlcədən qiymətlərə daxil edilməsi dolların sonrakı istiqamətini FED-in gələcək sərtləşdirmə siyasəti ilə bağlı mesajlarının müəyyənləşdirəcəyi ehtimalını artırır. “DBS Bank” da investorları FED qərarından əvvəl dolların yüksəlişinin ardınca getməkdə ehtiyatlı olmağa çağırıb. Bank hesab edir ki, bazarlar artıq faiz artımı tsiklini böyük ölçüdə nəzərə alıb və dərəcənin dəyişdirilməməsi də mümkün ssenarilərdən biridir.
Neft qiymətlərinin bahalaşması isə ABŞ xəzinədarlıq istiqrazlarının gəlirliliyini yüksəldərək inflyasiya ilə bağlı narahatlıqları artırır. Bu vəziyyət mərkəzi bankların qarşısında daha mürəkkəb siyasət seçimi yaradır və xüsusilə enerji idxalından asılı ölkələrin valyutalarına əlavə təzyiq göstərir.
Yaponiya yeni son günlərdəki möhkəmlənmədən sonra dollara qarşı təxminən 0,2 faiz zəifləyərək 154,72 səviyyəsinə düşüb. Buna baxmayaraq, valyuta BoJ-un faiz dərəcəsini artıracağı gözləntilərindən dəstək almaqda davam edir. İyena bu ay son geriləmədən əvvəl təxminən 4 faiz bahalaşmışdı.
Asiya valyutaları arasında İndoneziya rupisi də təzyiq altında qalıb. USD/IDR məzənnəsi 0,2 faiz artaraq 17 682,5 səviyyəsinə yüksəlib. Bu dinamika Prezident Prabovo Subiantonun maliyyə naziri Purbayya Yudhi Sadevanı maliyyə nazirinin müavini Suahasil Nazarla əvəz etməsindən sonra müşahidə olunub.
“DBS”in baş iqtisadçısı Radhika Rao bildirib ki, bazarın ilkin reaksiyası konstruktiv ola bilər və büdcə siyasətinə inam istiqraz bazarını və milli valyutanı dəstəkləyəcək. Onun fikrincə, gəlirlilik qısamüddətli perspektivdə ABŞ istiqraz bazarının dinamikasını izləyərək yüksək səviyyədə qala bilər, USD/IDR məzənnəsinin isə 17 600–17 800 diapazonunda hərəkət etməsi gözlənilir.
MONETAR.AZ
