Qızılın qiyməti 4290 ABŞ dolları ətrafında qərarlaşıb. Qiymət avqustun əvvəlindən bəri ən aşağı səviyyəyə enib.
Monetar.az xəbər verir ki, qızılın ucuzlaşmasına ABŞ dollarının möhkəmlənməsi və ABŞ xəzinə istiqrazlarının gəlirliliyinin yüksəlməsi təsir edib.
Neftin qiymətinin 100 dollardan yuxarı qalması da bazarlarda inflyasiya ilə bağlı narahatlıqları artırıb. Səudiyyə Ərəbistanının enerji infrastrukturuna hücumlar nəticəsində “Şərq-Qərb” boru kəmərinin fəaliyyətinin dayanması qlobal neft tədarükü ilə bağlı riskləri gücləndirib.
Eyni zamanda, ABŞ və İran arasında Hörmüz boğazı ilə bağlı fikir ayrılıqları davam edir. Babül-Məndəb boğazı yaxınlığında husilərin fəaliyyətinin artması da geosiyasi riskləri yüksəldən amillər sırasında göstərilir.
Bazar iştirakçıları ABŞ Federal Ehtiyat Sisteminin bu həftə faiz dərəcəsini 25 baza bəndi artıracağını gözləyirlər. İnvestorların əsas diqqəti faiz qərarından sonra Fed rəhbərliyinin gələcək sərtləşdirmə ilə bağlı mesajlarına yönələcək.
Yüksək enerji qiymətləri və Yaxın Şərqdə davam edən gərginlik qlobal inflyasiya gözləntilərini də çətinləşdirir.
