Avropada təbii qaz qiymətləri bugün Asiya ticarət sessiyasının əvvəlində kəskin artıb. Buna səbəb Donald Tramp tərəfindən ABŞ-ın Hörmüz boğazı üzərində tam blokada tətbiq edəcəyi ilə bağlı açıqlama olub.
Bloomberg yazır ki, Niderlandın TTF habı üzrə qaz fyuçersləri 18% artaraq 1 meqavat-saat üçün 51,30 avroya yüksəlib və Sinqapur vaxtı ilə saat 06:25-də 49,45 avro səviyyəsində ticarət olunub.
ABŞ və İranın həftəsonu Pakistanda keçirilən danışıqlarda razılığa gələ bilməməsi münaqişənin uzunmüddətli həllinə dair ümidləri zəiflədib. Bu fonda Tramp ABŞ Hərbi Dəniz Qüvvələrinin Hörmüz boğazına daxil olan və oradan çıxan bütün gəmiləri bloklayacağını bəyan edib. Bu addım gərginliyin daha da artmasına və boğazın uzun müddət bağlı qalması riskinə işarə edir.
Danışıqların uğursuzluğu qaz bazarında yeni volatillik dalğası yarada və qlobal təchizat çatışmazlığını davam etdirə bilər. Yaxın Şərqdən qazın böyük hissəsi adətən Asiyaya yönəlsə də, bu marşrutda davam edən pozuntular məhdud qlobal LNG həcmləri uğrunda rəqabəti artırır: xüsusilə də Avropanın qış mövsümünə hazırlaşmaq üçün ehtiyat topladığı bir vaxtda.
Qeyd olunur ki, Avropada qaz qiymətləri fevralın sonundan ABŞ və İsrailin İrana ilk hücumlarından sonra 50%-dən çox artıb. Bununla belə, qiymətlər martın 19-da qeydə alınan pik səviyyədən təxminən üçdə bir qədər geriləyib. Həmin vaxt İranın Qətərdə yerləşən dünyanın ən böyük LNG ixrac zavoduna zərbə endirməsindən sonra fyuçerslər kəskin yüksəlmişdi.
ABŞ hərbçiləri bildiriblər ki, Hörmüz boğazının blokadası bugün ABŞ-ın şərq vaxtı ilə saat 10:00-da başlayacaq. LNG ixracı isə artıq bir aydan çoxdur ki, bu marşrut üzrə dayandırılıb. Həftəsonu bəzi neft supertankerləri boğazdan keçsə də, LNG yükləri hələlik bu yolu istifadə etməyib.
