Dünya bazarında Brent markalı xam neftin qiyməti kəskin artaraq 120 dollara yaxınlaşıb. Bu, 2022-ci ilin iyun ayından bəri qeydə alınan ən yüksək göstəricidir.
Qiymət artımına əsas səbəb kimi İranla bağlı münaqişənin yaxın müddətdə həll olunacağına dair ümidlərin zəif qalması və Hörmüz boğazının açılması perspektivinin qeyri-müəyyən olması göstərilir. ABŞ Prezidenti Donald Tramp ölkəsinin İranla nüvə razılaşması əldə olunana qədər dəniz blokadasını davam etdirəcəyini bildirib.
Eyni zamanda, Birləşmiş Ərəb Əmirliklərinin OPEC-dən gözlənilməz çıxışı da bazarlarda əlavə gərginlik yaradıb. Analitiklər hesab edir ki, bu addım qlobal neft təklifinə mənfi təsir göstərə bilər.
ABŞ-da açıqlanan son məlumatlara görə, xam neft və yanacaq ehtiyatlarında kəskin azalma qeydə alınıb. Bununla yanaşı, ixrac gündəlik 6 milyon bareli ötərək rekord səviyyəyə çatıb. Bu amillər qlobal təklifin daraldığını və qiymətlərin yüksəlişini daha da gücləndirdiyini göstərir.
Mütəxəssislər bildirirlər ki, geosiyasi risklərin davam etməsi fonunda neft bazarında qiymət volatilliyi yaxın dövrdə də yüksək olaraq qalacaq.
MONETAR.AZ
