Yaponiyada istehlakçıları artıq bu yay ərzaq və içki məhsullarının qiymətlərində yeni artım dalğası gözləyir. Bloomberg agentliyinin məlumatına görə, səbəb məhsuldarlığın azalması deyil, geosiyasi amillərdir: Yaxın Şərqdəki müharibə plastik qablaşdırma istehsalında istifadə olunan əsas neft-kimya xammalının kəskin çatışmazlığına səbəb olub.
Hörmüz boğazı üzərindən enerji resurslarının daşınmasında yaranan uzunmüddətli fasilələr Asiya bazarında nafta çatışmazlığını kəskinləşdirib. Nafta polipropilen və polietilen istehsalı üçün əsas xammaldır və bu materiallar qida qablaşdırmasının əsasını təşkil edir.
Xammal çatışmazlığı ilə üzləşən plastik təchizatçıları ərzaq istehsalçılarından alış qiymətlərinin dərhal artırılmasını tələb ediblər. Teikoku Databank şirkətinin məlumatına görə, bu zərbəni ilk növbədə kiçik və orta biznes subyektləri hiss etməyə başlayıb.
Şirkətin hesabatında qeyd olunur ki, artıq qiyməti artmış və ya sentyabr ayına qədər bahalaşacağı gözlənilən qida və içki məhsulları təhlil edilib. Ən çox zərər görəcək kateqoriyalardan biri isə mürəkkəb çoxqatlı qablaşdırma tələb edən qənnadı məmulatları, o cümlədən şokolad olacaq.
Mart ayında Yaponiyada təzə ərzaq məhsullarının dəyişkən qiymətlərini nəzərə almayan baza istehlak qiymətləri indeksi illik ifadədə 1,8% artıb. Bu göstərici iqtisadçıların proqnozlarını üstələyib və fevral ayı ilə müqayisədə (1,6%) sürətlənib. Ümumi inflyasiya isə 1,5%-ə yüksəlib.
MONETAR.AZ
