ABŞ-ın Milli Avtomobil Yolları Hərəkəti Təhlükəsizliyi İdarəsi (NHTSA) dünən keyfiyyətsiz Çin istehsalı olan avtomobil hava yastığı əvəzedicilərini qadağan edib. Qərar 10 ölüm halı ilə nəticələnmiş qəzalardan sonra qəbul olunub və qurum bunu amerikalı sürücülər üçün ciddi risklərlə əsaslandırıb.
Qurum bildirib ki, ABŞ-da baş verən 12 qəza nəticəsində insanların ölümü və ya ağır xəsarət alması halları qeydə alınıb. Bu hadisələr Çin şirkəti Jilin Province Detiannuo Automobile Safety System Co Ltd (DTN) tərəfindən istehsal edilmiş hava yastığı əvəzedicilərinin partlaması ilə bağlıdır. Həmin məhsullar 2023-cü ilin may ayından etibarən ABŞ-a qanunsuz şəkildə idxal olunub.
Ölüm halları ilə nəticələnən bütün hadisələr General Motors və Hyundai markalı avtomobillərdə baş verib.
DTN şirkəti isə NHTSA-ya təqdim etdiyi sənədlərdə qeyd edib ki, sözügedən qurğuların məhz onlar tərəfindən istehsal edildiyini sübut etmək mümkün deyil və qəzalara səbəb kimi bu cihazların göstərilməsi də təsdiqlənə bilməz. Şirkət əlavə edib ki, araşdırma zamanı Çində keyfiyyətsiz hava yastığı istehsal edən ən azı beş şirkət müəyyən olunub. DTN həmçinin bildirib ki, bu məhsulları ABŞ bazarında heç vaxt birbaşa satmayıb.
NHTSA-nın məlumatına görə, DTN hava yastıqları normalda sağ qalmaq mümkün olan qəzalarda belə nasaz işləyib və iri metal qırıntılarını sürücülərin sinəsinə, boynuna, gözlərinə və üz nahiyəsinə doğru ataraq ciddi xəsarətlərə səbəb olub.
Qurum yanvar ayında avtomobil sahibləri və təmir emalatxanaları üçün təcili xəbərdarlıq yayıb. Son ölüm hadisəsi isə 16 fevral tarixində Missisipi ştatının Klarksdeyl şəhərində 2020-ci il istehsalı Chevrolet Malibu avtomobilində baş verib.
MONETAR.AZ
