Avstraliyanın uran hasilatı ilə məşğul olan şirkətlərinin səhmləri, Avstraliya ilə Hindistan arasında Avstraliya uranının Hindistana ixracına imkan verən inzibati prosedurların tamamlanmasından sonra cümə günü kəskin bahalaşıb. Yeni razılaşma investorların nüvə yanacağı istehsalçılarına marağını artırıb.
Ticarət zamanı "Paladin Energy" şirkətinin səhmləri 6% yüksəlib. "Deep Yellow Ltd" 10%-dən çox dəyər qazanıb. "Boss Energy" səhmləri 8%, "Bannerman Energy" 7%, "Lotus Energy" isə təxminən 14% bahalaşıb.
Saziş Avstraliyanın Baş naziri Entoni Albaneze ilə Hindistanın Baş naziri Narendra Modi arasında keçirilən danışıqlardan sonra elan olunub. Razılaşma 2014-cü ildə imzalanmış, lakin indiyədək tam icra olunmayan mülki nüvə əməkdaşlığı üzrə çərçivə sazişinin faktiki olaraq qüvvəyə minməsini təmin edir.
Yeni mexanizm beynəlxalq təhlükəsizlik təminatları çərçivəsində Avstraliyadan Hindistanın mülki nüvə energetikası üçün kommersiya məqsədli uran ixracına imkan yaradır.
Hindistan artan elektrik enerjisi tələbatını qarşılamaq və karbon emissiyalarını azaltmaq məqsədilə nüvə energetikası sahəsində istehsal güclərini genişləndirir. Dünyanın ən böyük sübut olunmuş uran ehtiyatlarına malik ölkələrindən biri olan Avstraliya isə yeni saziş çərçivəsində Hindistanın əsas uran tədarükçülərindən birinə çevrilməyə hazırlaşır.
MONETAR.AZ
