ABŞ fond bazarında çərşənbə günü qarışıq dinamika müşahidə olunub. S&P 500 indeksi 0,1% yüksəlib, Nasdaq və Dow Jones indeksləri isə sıfır həddinə yaxın dəyişib.
Monetar.az xəbər verir ki, investorlar Federal Ehtiyat Sisteminin (Fed) faiz qərarını və qurumun sədri Uorşun açıqlamalarını qiymətləndiriblər.
Fed gözlənildiyi kimi faiz dərəcələrini dəyişməyərək 3,75-4% səviyyəsində saxlayıb. Bununla belə, iki siyasətçi faizlərin 0,25 faiz bəndi artırılmasının lehinə çıxış edib.
Fed sədri Uorş inflyasiya gözləntilərinin sabit qaldığını bildirib. O, həmçinin gələn ildən etibarən qurumun iclas qrafikində dəyişikliklər ediləcəyini açıqlayıb.
Şirkətlərin maliyyə nəticələri də investorların diqqət mərkəzində olub. Microsoft-un səhmləri 0,5% ucuzlaşıb, “Alphabet”in səhmləri isə 1,6% bahalaşıb. Hər iki şirkətin rüblük hesabatlarını ticarət sessiyasının bağlanmasından sonra açıqlaması gözlənilib.
“Alphabet”in səhmlərinə “OpenAI” şirkətinin süni intellekt hesablamaları üçün “Google”un çiplərini almaq niyyəti barədə xəbər də dəstək verib.
“SK Hynix” şirkətinin rekord rüblük mənfəəti yarımkeçirici sektorunda bəzi səhmlərin bahalaşmasına səbəb olub. “Micron Technology” 5,6%, “AMD” isə 2,6% yüksəlib.
Digər tərəfdən, “Apple”ın səhmləri sensor ekranlı yenilənmiş “MacBook Pro” modelini təqdim etməsinə baxmayaraq, 0,8% ucuzlaşıb. “Meta”nın səhmləri 1,2%, “Tesla”nın səhmləri isə 1% dəyər itirib.
