Çində tənzimləyici orqanlar rəqabətə və platformalardan istifadə edən satıcıların hüquqlarına zərər vura biləcək mümkün ticarət təcrübələrini araşdırmaq məqsədilə dörd onlayn otel və səyahət bronlaşdırma platforması ilə bağlı yoxlamalara başlayıb.
“Bloomberg”in məlumatına görə, araşdırmalar Pekin Şəhər Bazarın Tənzimlənməsi İdarəsinin qərarı əsasında “Hangzhou Taomei Aviation Service”, “Tongcheng Network Technology”, “Tujia Online Information Technology (Tianjin)” və “Beijing Sankuai Information Technology” şirkətlərinə qarşı aparılır.
Tənzimləyici araşdırmalar Çinin onlayn səyahət sektorunda aparılan genişmiqyaslı təhlildən və Dövlət Bazarın Tənzimlənməsi İdarəsi ilə Mədəniyyət və Turizm Nazirliyinin otel və turizm xidmətlərinin bronlaşdırılması platformaları ilə keçirdiyi görüşlərdən sonra başlayıb.
Hakimiyyət orqanları platformaların azad rəqabətə və onların xidmətlərindən istifadə edən satıcıların hüquqlarına təsir göstərə biləcək biznes təcrübələrini araşdırır. Xüsusilə platformaların otellər və digər xidmət təminatçıları ilə münasibətlərində tətbiq etdiyi qaydalar və mexanizmlər diqqət mərkəzindədir.
Çin Qonaqpərvərlik Assosiasiyası araşdırmaları dəstəkləyib və onlayn bronlaşdırma platformalarını ticarət qaydaları və istifadə etdikləri alqoritmlərlə bağlı daha şəffaf məlumat təqdim etməyə çağırıb. Assosiasiya axtarış nəticələrində sıralamanın müəyyənləşdirilməsi, platforma trafikinin bölüşdürülməsi, komissiya dərəcələri və reklam proqramlarının satıcılara daha aydın izah edilməsinin vacibliyini vurğulayıb.
Sənaye təşkilatı həmçinin sektorda özünütənzimləmə mexanizmlərinin gücləndirilməsini və onlayn bronlaşdırma platformaları ilə qonaqpərvərlik sektorunda fəaliyyət göstərən müəssisələr arasında əməkdaşlığın genişləndirilməsini təklif edib.
Tənzimləyici orqanların son addımı Çində onlayn otel və səyahət bronlaşdırılması sektoruna nəzarətin gücləndirildiyini göstərir. Bu proses iyul ayında “Trip.com Group”a qarşı 5,18 milyard yuan, yəni təxminən 765 milyon dollar məbləğində antiinhisar cəriməsinin tətbiq edilməsindən sonra daha da diqqət çəkib. Şirkət onlayn otel bronlaşdırılması bazarındakı mövqeyindən sui-istifadə etməkdə ittiham olunaraq cərimələnib.
Hazırda son araşdırmaya cəlb edilən dörd platformaya qarşı hər hansı sanksiya və ya yekun qərar elan edilməyib. Tənzimləyici araşdırmaların nəticəsindən asılı olaraq şirkətlərin fəaliyyətinə dair əlavə tədbirlərin görülüb-görülməyəcəyi müəyyənləşəcək.
MONETAR.AZ
