İngiltərə milli komandasının sabiq kapitanı David Beckham Hollivuddakı Hollywood Walk of Fame üzərində ulduz alan ilk futbolçu olub. Onun ulduzu xiyabanda yerləşdirilən 2849-cu ulduz kimi tarixə düşüb.
Mükafatlandırma mərasimində çıxış edən Bekhem bu hadisənin onun üçün xüsusi əhəmiyyət daşıdığını bildirib: “Etiraf etməliyəm ki, bütün bunlar bir qədər qeyri-real görünür. Karyeram ərzində çox möhtəşəm anlar yaşamışam, lakin burada, Los-Ancelesdə olmaq və dünya şöhrətli ‘Şöhrət Xiyabanı’nda öz ulduzumu almaq həqiqətən inanılmazdır.”
51 yaşlı Bekhem İngiltərə millisinin heyətində 115 oyuna çıxıb və 17 qol vurub. O, karyerası ərzində Manchester United, Real Madrid, LA Galaxy, AC Milan və Paris Saint-Germain komandalarının formasını geyinib.
May ayında yayımlanan məlumata görə, Bekhem ilk britaniyalı idmançı-milyarder hesab olunur. O, Inter Miami CF klubunun səhmdarlarından biridir. Klubda hazırda Lionel Messi çıxış edir və Bekhemin payının təxminən 300 milyon funt sterlinq dəyərində olduğu bildirilir.
