2025-ci ildə kosmik buraxılışların sayı üzrə ABŞ digər supergücləri xeyli geridə qoyub.
Təhlillərə görə, ABŞ 2025-ci ildə 181 kosmik buraxılış həyata keçirib. Bu göstərici Çin (93 buraxılış) və Rusiyanı (17 buraxılış) əhəmiyyətli fərqlə qabaqlayıb.
Məlumatlarda qeyd olunur ki, kosmos yarışı ilk dəfə Soyuq Müharibə dövründə SSRİ-nin “Sputnik-1” peykini orbitə göndərməsi ilə başlayıb. O dövrdə uzun illər SSRİ kosmik buraxılış sayında ABŞ-dan üstün olub və 1980-ci illərin əvvəllərində rekord göstəricilərə çatıb.
1990-cı illərdə SSRİ-nin dağılmasından sonra Rusiya kosmik fəaliyyətində ciddi azalma müşahidə olunub, ABŞ isə tədricən liderliyini gücləndirib.
2000-ci illərdən etibarən Çin kosmik sahədə sürətli inkişaf mərhələsinə daxil olub və 2010-cu ildən sonra buraxılış sayını kəskin artıraraq qlobal rəqabətdə ön sıralara yüksəlib.
Məlumata görə, kosmik sənayedə yeni mərhələ 2016-cı ildən başlayıb. Özəl şirkətlərin və təkrar istifadə olunan raket texnologiyalarının inkişafı ABŞ-ın kosmik buraxılışlarda sürətli artımına səbəb olub.
Ekspertlər bildirirlər ki, kosmik buraxılışlar yalnız elmi tədqiqatlarla məhdudlaşmır, həm də peyk rabitəsi, hərbi kommunikasiya, GPS sistemləri və Yer müşahidəsi kimi strateji sahələr üçün həlledici əhəmiyyət daşıyır.
Hazırkı tendensiya ABŞ-ın kosmik sənayedə həm texnoloji, həm də geosiyasi üstünlüyünü daha da gücləndirdiyini göstərir.
MONETAR.AZ
