DİM dövlət orqanlarında 16 vakant vəzifə üzrə daxili müsahibə elan edib
Azərbaycan Respublikasının Dövlət İmtahan Mərkəzi (DİM) dövlət orqanlarında vakant vəzifələrin tutulması məqsədilə daxili müsahibə elan edib.
İyunun 5-də elan olunan müsahibə çərçivəsində 8 dövlət orqanı üzrə ümumilikdə 16 vakant vəzifə təqdim olunub. Vakansiyalar dövlət qulluğunun 2-ci, 3-cü və 4-cü təsnifatları üzrə bölüşdürülüb.
Məlumata görə, vakant yerlərdən 4-ü 2-ci təsnifat, 11-i 3-cü təsnifat, 1-i isə 4-cü təsnifat üzrədir. Müsahibəyə çıxarılan vəzifələrin əksəriyyəti idarəetmə və qərar qəbuletmə səlahiyyətlərinə malik rəhbər postlardır.
Vakansiyalar arasında ən yüksək statuslu vəzifə Azərbaycan Respublikasının Maliyyə Nazirliyi yanında Dövlət Müəssisələrinin Monitorinqi Agentliyinin direktoru vəzifəsidir. Sözügedən vəzifə dövlət qulluğunun 2-ci təsnifatına daxildir.
Müraciətlərin qəbulu elektron qaydada həyata keçirilir. Namizədlər 5–19 iyun tarixlərində DİM-in elektron portalı vasitəsilə qeydiyyatdan keçərək “Dövlət qulluğu üzrə müraciət forması”nı doldurmalı və müraciətlərini təsdiqləməlidirlər.
Sənəd qəbulu 19 iyun 2026-cı il saat 18:00-da başa çatacaq.
Daxili müsahibədə elan olunmuş vəzifələrin tutulma şərtlərinə cavab verən Azərbaycan vətəndaşları iştirak edə bilərlər. Müsahibə dövlət qulluğunda çalışan şəxslər və ehtiyat kadrlar üçün karyera yüksəlişi imkanı yaradır.
MONETAR.AZ
