Dünyanın ən böyük enerji istehlakçılarından olan Hindistan, xarici neftdən asılılığı minimuma endirmək və tədarük mənbələrini şaxələndirmək (diversifikasiya etmək) istiqamətində növbəti strateji addımını atır. Bloomberg-in məlumatına görə, ölkənin Neft naziri Hardeep Puri Yeni Dehlidə keçirilən təqdimat mərasimində tərkibində yüksək bioməhsul olan yeni yanacaq qarışığını rəsmən dövriyyəyə buraxır.
İlkin mərhələdə Indian Oil Corp. şəbəkəsinə daxil olan 50 yanacaqdoldurma məntəqəsində (YDM) satışa çıxarılacaq bu yanacaq, ölkənin yaşıl enerjiyə keçid proqramının əsas sütunlarından biri hesab olunur.
Hindistan artıq bir müddətdir ki, pərakəndə satış şəbəkəsində 20% etanol tərkibli E20 benzinindən aktiv istifadə edir. Yeni təqdim olunan E85 qarışığı isə tamamilə fərqli bir mərhələdir:
-
Tərkibi: Təxminən 85% ekoloji təmiz etanol və 15% ənənəvi benzin.
-
Xammal mənbəyi: Şəkərqamışı, düyü və qarğıdalı kimi yerli kənd təsərrüfatı məhsulları və onların tullantıları.
-
Ekoloji effekti: Ənənəvi qalıq yanacaqları ilə müqayisədə atmosferə buraxılan karbon emissiyasını kəskin şəkildə azaldır.
Hindistanda yüksək qiymətlər və doldurma məntəqələrinin (şarj infrastrukturunun) çatışmazlığı səbəbindən elektromobillərə keçid olduqca ləng gedir. Hökumət isə milyardlarla dollar xərcləyib elektrik şəbəkəsi qurmaqdansa, mövcud YDM-lərdən istifadə etməyi daha effektiv yol sayır:
Bu məqsədlə artıq nəqliyyat ekosistemi də yenilənir. Nazir Puri bu həftə ölkədə ən çox satılan nəqliyyat vasitələrinin — Hero MotoCorp motosikletlərinin və Maruti Suzuki Wagon R hetçbekinin sırf E85 yanacağı ilə işləyə bilən yeni xüsusi modifikasiyalarını təqdim edib.
Etanolun yanacaq sektorunda geniş tətbiqi Hindistan üçün həm də daxili sosial layihə xarakteri daşıyır:
-
İdxalın azaldılması: Son 5 maliyyə ilində ölkədə (xüsusilə iki təkərli nəqliyyatda) benzin istehlakı ildə orta hesabla 9% artıb və bu da neft idxalı faturasını böyüdüb. Etanol bu asılılığı birbaşa azaldır.
-
Kəndlinin gəliri: Etanola yüksək tələb yerli şəkərqamışı və dənli bitki istehsalçılarının (fermerlərin) gəlirlərini birbaşa stimullaşdıracaq.
Layihənin uğuru və kütləviləşməsi iki əsas amildən asılı olacaq:
--Mühərrikin dayanıqlığı: Sürücülər arasında yüksək konsentrasiyalı spirt qarışığının mühərrik hissələrini korroziyaya uğratması və yanacaq sərfiyyatını artırması ilə bağlı hələ də narahatlıqlar var. Nazirlik isə əksinə, E20 və E85-in daha rəvan sürüş və yüksək sürətlənmə dinamikası verdiyini iddia edir.
--Qiymət rəqabəti: E85 yanacağının geniş kütlələr tərəfindən qəbul edilməsi üçün onun pərakəndə satış qiyməti mövcud E20 benzinindən daha cəlbedici olmalıdır.
MONETAR.AZ
