Çikaqo Əmtəə Birjasında (CBOT) soya fyuçersləri bazar ertəsi başlayan satış dalğasının davam etməsi və qlobal neft qiymətlərinin enməsi fonunda çərşənbə axşamı da ucuzlaşıb.
Noyabr tədarükü üzrə soya fyuçersləri (SX26) 5 sent azalaraq bir buşel üçün 12,08-3/4 dollar səviyyəsində ticarət olunub.
Qiymətlərə əsas təzyiq bazardakı aktiv satışlar və enerji bazarlarındakı zəif dinamika göstərsə də, enişi yüksək ixrac tələbi və ABŞ Kənd Təsərrüfatı Nazirliyinin (USDA) açıqladığı məhsul vəziyyəti ilə bağlı hesabat müəyyən qədər məhdudlaşdırıb.
USDA-nın həftəlik qiymətləndirməsinə əsasən, ABŞ-da soya əkinlərinin "yaxşı" və "əla" vəziyyətdə olan hissəsi bir həftə əvvəlki 66%-dən 63%-ə enib. Bu göstərici analitiklərin orta proqnozundan da 1 faiz bəndi aşağı olub ki, bu da bazarda gələcək məhsuldarlıqla bağlı narahatlıqları artırıb.
Digər tərəfdən, Çinin dövlət taxıl ehtiyatları operatoru Sinograin cümə günü keçiriləcək hərracda təxminən 500 min metrik ton idxal olunmuş soyanı satışa çıxaracağını açıqlayıb. Bu, şirkətin yanvar ayından bəri həyata keçirdiyi ən iri həcmli strateji ehtiyat satışı olacaq.
Bazar iştirakçıları hesab edirlər ki, bu addım yaxın aylarda ABŞ-dan gözlənilən yeni soya tədarükləri üçün anbar tutumunun artırılması məqsədi daşıyır.
MONETAR.AZ
