Rusiya Prezidenti Vladimir Putin Pekinə reallaşdırdığı iki günlük rəsmi səfərini başa vuraraq Çindən ayrılıb. Pekin hava limanında fəxri qarovul dəstəsi və əllərində hər iki ölkənin bayraqlarını dalğalandıran məktəblilər tərəfindən rəsmi mərasimlə yola salınan Rusiya liderinin bu missiyası, qlobal geosiyasi müstəvidə güclərin yenidən paylandığı kritik bir dövrə təsadüf edir.
Mayın 19-da başlayan səfər çərçivəsində Çin Xalq Respublikasının Sədri Si Cinpin ilə təkbətək və geniş tərkibdə danışıqlar aparan Putin, Moskva-Pekin xəttindəki strateji müttəfiqliyin miqyasını daha da genişləndirib.
Xüsusilə ABŞ Prezidenti Donald Trampın bu yaxınlarda reallaşan Pekin səfərinin dərhal ardınca baş tutan bu görüş, Çinin qlobal diplomatiyanın idarəetmə mərkəzinə çevrildiyini bir daha nümayiş etdirib. Görüş zamanı liderlər dünyadakı "birtərəfli hegemonluq" cəhdlərinə və beynəlxalq hüququn "meşə qanunları" ilə əvəzlənməsi riskinə qarşı birgə müqavimət mesajı veriblər.
Danışıqların yekununda ticarət, media, elmi araşdırmalar və enerji sahələrini əhatə edən böyük bir sənəd paketi imzalanıb. Rusiya Yaxın Şərqdəki mövcud gərginlik fonunda Çin üçün ən etibarlı enerji tərəfdaşı olduğunu təsdiqləsə də, Monqolustandan keçəcək "Sibir Gücü 2" nəhəng qaz kəməri layihəsinin bəzi kommersiya detalları tam yekunlaşmayıb.
Rəsmi imzalanma mərasimindən sonra iki ölkə lideri qeyri-rəsmi çay ziyafətində beynəlxalq gündəmdəki ən aktual böhranları, o cümlədən Ukraynadakı son vəziyyəti qapalı qapılar arxasında dərindən təhlil ediblər. Səfərin nəticələrini "çox zəngin" adlandıran Si Cinpin Rusiya ilə strateji tərəfdaşlığın 30, "Xoş qonşuluq, dostluq və əməkdaşlıq haqqında" müqavilənin isə 25 illik yubileyi fonunda bu əlaqələrin sarsılmaz olduğunu vurğulayıb.
Çin rəsmi olaraq Ukrayna məsələsində "neytral vasitəçi" statusunu qorumağa çalışsa da, bu sammit Pekinin rəsmi Moskvaya olan iqtisadi və siyasi dəstəyinin strateji xarakter daşıdığını növbəti dəfə təsdiqləyib. Səfərin sonunda Vladimir Putin çinli həmkarını gələn il Rusiyaya cavab səfərinə dəvət edib.
MONETAR.AZ
