ABŞ administrasiyası 16 ölkə və iqtisadiyyatla bağlı yeni ticarət araşdırmalarına başladığını elan edib.
Məlumata görə, bu addım ABŞ Ali Məhkəməsinin qarşılıqlı tarifləri qanunsuz hesab etməsindən sonra yeni gömrük rüsumlarının tətbiqi üçün mexanizm yaratmaq məqsədi daşıyır.
ABŞ Ticarət Nümayəndəsi Ceymison Qrir jurnalistlərə açıqlamasında bildirib ki, araşdırmalar ABŞ ticarət qanunvericiliyinin “Section 301” maddəsi çərçivəsində aparılacaq.
Qanun ABŞ-a ədalətsiz ticarət praktikaları tətbiq etdiyi müəyyən edilən ölkələrdən idxal olunan məhsullara əlavə gömrük rüsumları tətbiq etmək imkanı verir. Yeni tariflərin ötən il ABŞ prezidenti Donald Tramp administrasiyası tərəfindən Konqresin təsdiqi olmadan tətbiq edilmiş bəzi qarşılıqlı tarifləri əvəz edə biləcəyi bildirilir.
Ceymison Qrir qeyd edib ki, prezidentin ticarət siyasətində əsas məqsəd ABŞ-da məşğulluğu qorumaq və ticarət tərəfdaşları ilə daha ədalətli ticarət şəraitini təmin etməkdir.
Araşdırma aparılan iqtisadiyyatlar arasında Çin, Meksika və Avropa İttifaqı ilə yanaşı, Yaponiya, Hindistan, Tayvan, Vyetnam, Cənubi Koreya, Sinqapur, İsveçrə, Norveç, İndoneziya, Malayziya, Kamboca, Banqladeş və Tailand də yer alır.
MONETAR.AZ
