ABŞ Federal Ehtiyat Sisteminin (FED) İdarə Heyətinin üzvü Liza Kuk süni intellektə yatırılan investisiyaların yaxın perspektivdə məhsuldarlığı artırsa da, bunun artan inflyasiya təzyiqini kompensasiya etməyə kifayət etməyə biləcəyini bildirib.
Monetar.az xəbər verir ki, Liza Kukun sözlərinə görə, süni intellektin tətbiqindən əldə ediləcək məhsuldarlıq artımı yaxın bir neçə ildə inflyasiyanın müəyyən qədər qarşısını ala bilər. Lakin bu təsirin ilin ikinci yarısında gözlənilən əlavə qiymət təzyiqini qısa müddətdə kompensasiya edəcəyi ehtimalı aşağıdır.
FED rəsmisi bildirib ki, məlumat mərkəzlərinə böyük həcmdə investisiyalar elektrik enerjisi və tikinti sektorunda əmək resursları kimi ümumi resurslara tələbi artırır. Son bir ildə elektrik enerjisi və su təchizatı xərclərinin təxminən 5 faiz yüksəldiyi qeyd olunur.
Kuk həmçinin süni intellektlə əlaqəli texnologiya şirkətlərinin səhmlərinin bahalaşmasının istehlak xərclərini stimullaşdıra biləcəyini vurğulayıb. Şirkətlərin elan etdiyi 2 trilyon dollarlıq kapital qoyuluşunun hələ ki, yalnız kiçik hissəsinin reallaşdırıldığını nəzərə alan FED rəsmisi bunun iqtisadiyyat üzrə daha geniş qiymət təzyiqi yarada biləcəyini bildirib.
O, süni intellekti “həyatımızın ən əhəmiyyətli texnoloji dəyişikliklərindən biri” adlandırsa da, texnologiyanın ümumi məhsuldarlığa nə qədər sürətlə təsir edəcəyinin hələ aydın olmadığını qeyd edib.
Kukun sözlərinə görə, ABŞ əmək bazarında vəziyyət də faiz dərəcələrinin artırılmasına imkan verəcək səviyyədədir. İşsizlik səviyyəsində azalma tendensiyası müşahidə olunur, digər göstəricilər isə əmək bazarının ümumilikdə balanslı olduğunu və tədricən yaxşılaşdığını göstərir.
FED rəsmisi bildirib ki, əmək bazarındakı dayanıqlılıq iqtisadi artımın digər göstəricilərində də özünü göstərir. Onun sözlərinə görə, ABŞ iqtisadiyyatı son bir ildə gözləniləndən daha sabit dinamika nümayiş etdirib.
FED-in bu ay faiz dərəcəsini 0,25 faiz bəndi artırdığı və ilin sonuna qədər daha bir artım imkanını nəzərdə tutduğu bildirilir. Tənzimləyicinin əsas məqsədi inflyasiyanı 2 faizlik hədəfə qaytarmaq üçün iqtisadiyyata göstərilən stimullaşdırıcı təsiri azaltmaqdır.
