Avropa Mərkəzi Bankının (AMB) İdarə Heyətinin üzvü Alvaro Santos Pereira bildirib ki, inflyasiya təzyiqlərinin artdığı bir vaxtda bank gecikmədən hərəkət etməlidir.
Pereira Portuqaliyanın Negocios nəşrinə verdiyi müsahibədə deyib ki, inflyasiyanın daha da güclənməsinin qarşısını almaq üçün erkən addımlar atmaq vacibdir.
Onun sözlərinə görə, qiymət artımlarının davam edəcəyinə dair siqnallar olduğu halda gözləmək düzgün yanaşma deyil. Pereira hesab edir ki, sonradan daha ciddi nəticələrlə üzləşməmək üçün AMB daha sürətli və qətiyyətli qərarlar qəbul etməlidir.
Bu açıqlama Avropa Mərkəzi Bankının 10–11 iyun tarixlərində keçiriləcək pul siyasəti iclası ərəfəsində səsləndirilib. Bazar iştirakçıları və iqtisadçılar həmin iclasda faiz dərəcələrinin 0,25 faiz bəndi artırılacağını gözləyirlər.
Pereira vurğulayıb ki, onu iqtisadi artımın zəifləməsindən daha çox inflyasiya riski narahat edir. O bildirib ki, qiymətlərin artımı ilə bağlı təhlükələr yarananda vaxtında müdaxilə etmək böyük əhəmiyyət daşıyır.
MONETAR.AZ
