ABŞ Prezidenti Donald Tramp Kanada ilə sənədlərin yekunlaşdırılması şərti ilə ticarət razılaşmasına nail olduqlarını açıqlayıb və sazişin hər iki tərəf üçün “olduqca ədalətli” olduğunu bildirib.
Monetar.az xəbər verir ki, Tramp ABŞ fermerlərinin Kanadaya ixrac etdiyi məhsullara tətbiq olunan gömrük rüsumlarının sıfırlanacağını açıqlayıb.
Tramp Ağ Evin həyətində jurnalistlərin suallarını cavablandırarkən Kanada ilə aparılan ticarət danışıqlarından danışıb. O, Kanada Baş naziri Mark Karni ilə yaxşı görüş keçirdiyini və razılaşmaya nail olduqlarını bildirib.
ABŞ Prezidenti Kanadadan idxal olunan bəzi məhsullara 50 faizlik gömrük rüsumunun tətbiqinin planlaşdırıldığını xatırladaraq, yeni razılaşmanın hər iki tərəf üçün sərfəli olduğunu deyib.
Tramp ABŞ fermerlərinin Kanadaya böyük məbləğdə gömrük rüsumları ödədiyini qeyd edib və bu rüsumların tamamilə aradan qaldırılaraq sıfıra endiriləcəyini bildirib.
Kanadada istehsal olunan avtomobillərə tətbiq edilən tariflərin azaldılıb-azaldılmayacağı ilə bağlı suala cavab verən Tramp Kanadanın müəyyən addımlar atdığını qeyd edib.
ABŞ Prezidenti Kanada məhsullarına tətbiqi planlaşdırılan 50 faizlik tarifin üç gün təxirə salındığını xatırladıb. O, yekun sənədlərin hazırlanmasından asılı olaraq Kanada ilə razılaşmanın əldə edildiyini vurğulayıb.
ABŞ Ticarət Nümayəndəliyinin (USTR) açıqlamasında razılaşmanın bütün ABŞ malları üçün geniş bazar çıxışı, iqtisadi təhlükəsizlik öhdəlikləri və rəqəmsal ticarətə uyğunlaşdırma tədbirlərini əhatə edəcəyi bildirilib.
Kanadanın Ticarət naziri Dominik Leblan da Vaşinqtonda ABŞ Ticarət Nümayəndəsi Ceymison Qreerlə görüşdüyünü açıqlayıb. O, iki ölkə arasında yekun razılaşmanın əldə olunması istiqamətində işlərin davam etdiyini bildirib.
Kanada Baş naziri Mark Karni isə danışıqlarda əldə edilən irəliləyişə görə Leblan və Qreeri təbrik edib. O, ölkəsinin əsas strateji sektorları üzrə əlverişli şərtlərin təmin edilməsinə və gələcək ticarət əlaqələrində daha çox proqnozlaşdırıla bilən mühitin yaradılmasına çalışdıqlarını bildirib.
