ABŞ Maliyyə Nazirliyi İran hakimiyyəti və İslam İnqilabı Keşikçiləri Korpusunun (SEPAH) maraqları naminə qanunsuz maliyyə əməliyyatlarına yardım göstərməkdə şübhəli bilinən Kanadanın 8 maliyyə xidmətləri şirkətini sanksiya siyahısına daxil edib.
“Economic Outcast” əməliyyatı çərçivəsində qəbul edilən qərar Ontario və Britaniya Kolumbiyası əyalətlərində fəaliyyət göstərən şirkətlərin ABŞ yurisdiksiyasına aid bütün aktivlərinin bloklanmasını nəzərdə tutur.
Vaşinqtonun rəqəmsal aktivlər vasitəsilə sanksiyalardan yayınma hallarına qarşı tədbirləri çərçivəsində hədəfə alınan şirkətlər arasında Million Exchange, Amin Exchange, Farah Exchange və NIA Nations Currency də var.
ABŞ tərəfinin iddialarına görə, bu qurumlar iranlı kontragentlərə İran rialını kriptovalyutaya çevirmək, eləcə də əvvəllər sanksiya siyahısına daxil edilmiş Nobitex və Shelbit kriptovalyuta birjaları ilə əməliyyatlar aparmaq imkanı yaradıblar.
Maliyyə kanallarının başqa məqsədlər üçün də istifadə edildiyi bildirilir. ABŞ federal hakimiyyət orqanlarının məlumatına əsasən, beynəlxalq kokain ticarəti şəbəkəsinə rəhbərlik etməkdə ittiham olunan keçmiş olimpiya snoubordçusu Rayan Ueddinq (Ryan Wedding) rəqəmsal aktivlər vasitəsilə çirkli pulların yuyulması üçün bu kanallardan yararlanıb.
Sanksiya tədbirləri Kanadanın maliyyə kəşfiyyatı bölməsi FINTRAC və ABŞ-ın Maliyyə Cinayətləri ilə Mübarizə Şəbəkəsi (FinCEN) ilə koordinasiya şəraitində həyata keçirilib. Bu əməkdaşlıq Şimali Amerikada fəaliyyət göstərən qeyri-bank maliyyə və likvidlik kanallarına nəzarətin gücləndirilməsinə yönəlib.
ABŞ Maliyyə naziri Skott Bessent bildirib ki, transsərhəd maliyyə xidmətləri şirkətləri dövlət səviyyəsində təşkil olunan sanksiyalardan yayınma sxemləri üçün sığınacaq rolunu oynaya bilməz. Onun sözlərinə görə, Vaşinqton fəaliyyət göstərdikləri yurisdiksiyadan asılı olmayaraq beynəlxalq maliyyə vasitəçilərinə nəzarəti davam etdirəcək.
ABŞ-ın qərarı Kanadada maliyyə sektoruna nəzarətin gücləndirildiyi dövrə təsadüf edib. FINTRAC-ın virtual aktivlərlə bağlı əməliyyatlara nəzarəti sərtləşdirməsi fonunda 2026-cı ildə artıq 161 maliyyə xidmətləri şirkətinin qeydiyyatı ləğv edilib.
Vaşinqtonun bu addımı ABŞ və Kanada arasında ticarət sahəsində fikir ayrılıqlarının davam etdiyi bir vaxta təsadüf edir. Yeni sanksiyalar iki ölkə arasında sərhədyanı maliyyə təhlükəsizliyi və hüquq-mühafizə sahəsində şəffaflıq məsələlərini də yenidən gündəmə gətirir.
MONETAR.AZ
