Barclays bankı Yaxın Şərqdə geosiyasi gərginliyin azalması və bunun fonunda aviasiya yanacağının ucuzlaşması ehtimalını nəzərə alaraq beş Avropa aviaşirkəti ilə bağlı investisiya qiymətləndirmələrini yaxşılaşdırıb.
Endryu Lobbenberqin rəhbərlik etdiyi analitiklər qrupu hesab edir ki, spot və forvard yanacaq qiymətlərinin aşağı düşməsi aviaşirkətlərin əməliyyat xərclərini azaldacaq. Eyni zamanda, ekonom və premium siniflərdə sərnişin tələbatının qorunması şirkətlərin gəlirlərinə müsbət təsir göstərə bilər.
Barclays ən ciddi reytinq dəyişikliyini Air France-KLM üçün edib. Bank şirkətin reytinqini iki pillə yüksəldərək “Underweight” səviyyəsindən “Overweight” səviyyəsinə qaldırıb. Hədəf qiymət isə 9 avrodan 18 avroya çatdırılıb.
Analitiklər 2026 və 2027-ci maliyyə illəri üzrə şirkətin EBIT göstəricisinə dair proqnozlarını müvafiq olaraq 46% və 100% artırıblar. Premium seqmentdə tələbatın davamlı olması, eləcə də Şimali Atlantika, Asiya, Latın Amerikası və Afrikanı əhatə edən geniş uzaqməsafəli uçuş şəbəkəsi şirkətin mövqelərini gücləndirən amillər kimi qiymətləndirilib.
Ryanair-in reytinqi də “Equal Weight” səviyyəsindən “Overweight” səviyyəsinə yüksəldilib. Şirkət üzrə hədəf qiymət 24 avrodan 29 avroya artırılıb. Barclays hesab edir ki, aviaşirkətin yanacaq risklərini nisbətən az hecləməsi qiymətlərin enməsindən daha çox faydalanmasına imkan yaradır. Belə ki, Ryanair-in 2028-ci maliyyə ili üzrə yanacaq tələbatının cəmi 25%-i heclənib.
Norwegian Air Shuttle də bankın müsbət qiymətləndirdiyi şirkətlər sırasına daxil edilib. Aviaşirkətin reytinqi “Equal Weight”dən “Overweight”ə qaldırılıb, hədəf qiyməti isə 11,50 Norveç kronundan 16 krona yüksəldilib. Şirkətin 2027-ci maliyyə ili üzrə yanacaq tələbatının yalnız 22%-ni hecləməsi onu forvard qiymətlərdəki enişə daha həssas edir.
Barclays Lufthansa ilə bağlı qiymətləndirməsini “Underweight”dən “Equal Weight” səviyyəsinə yüksəldib. Şirkətin hədəf qiyməti 7,50 avrodan 8,40 avroya çatdırılıb.
Bununla belə, bank Lufthansa-nın Asiya sərnişin bazarından və yük daşımalarından yüksək asılılığını nəzərə alaraq daha ehtiyatlı yanaşma nümayiş etdirir. Analitiklərin fikrincə, Yaxın Şərqdə gərginliyin azalması bu bazarlarda gəlirliliyin zəifləməsinə səbəb ola bilər.
Finnair-in reytinqi də “Underweight”dən “Equal Weight” səviyyəsinə qaldırılıb. Aviaşirkət üzrə hədəf qiymət 3,40 avrodan 4,60 avroya artırılıb. Şirkətin Asiya istiqamətli uçuşlardan asılılığı Barclays-in ehtiyatlı mövqeyini qorumasının əsas səbəblərindən biridir.
Barclays analitikləri bildirirlər ki, III rübdə vahid tutuma düşən gəlir göstəriciləri, eləcə də IV rüb üçün proqnozlar əvvəlki modellərdə nəzərdə tutulandan daha güclü olub.
Bankın yenilənmiş qiymətləndirmələri mövcud forvard yanacaq qiymətlərinə əsaslanır. Bununla yanaşı, hesablamalarda Hörmüz boğazından gəmiçiliyin tam bərpası hələ nəzərə alınmayıb.
Analitiklərin fikrincə, Yaxın Şərqdə gərginliyin azalması yanacağın qiymətini daha da aşağı sala bilər. Bununla belə, qiymətlərin 2026-cı ilin fevral səviyyələrindən yuxarı qalacağı ehtimal olunur.
Digər tərəfdən, geosiyasi böhran uzanarsa, yanacaq bazarında müşahidə olunan son ucuzlaşma geri çevrilə bilər. Bu isə aviaşirkətlərin xərclərinin azalması ilə bağlı müsbət gözləntiləri zəiflədərək, hətta tamamilə aradan qaldıra bilər.
MONETAR.AZ
