ABŞ-da noyabrın 3-də keçirilən aralıq seçkilərdən sonra Konqresdə demokratların üstünlük qazanması İlon Maskın biznes imperiyası və şəxsi sərvəti üçün yeni risklər yaradıb. CNBC və Deutsche Bank analitiklərinin qiymətləndirmələrinə görə, seçkilərdən sonrakı iki gün ərzində Tesla və SpaceX şirkətlərinin ümumi bazar dəyəri 420 milyard dollar azalıb.
Səhm qiymətlərindəki eniş Maskın şəxsi sərvətinə də ciddi təsir göstərib. Son bir həftə ərzində onun sərvətinin 90 milyard dollar azalaraq təxminən 800 milyard dollara düşdüyü bildirilir.
İlon Mask seçki kampaniyası dövründə Respublikaçılar Partiyasını dəstəkləyib və bu məqsədlə təxminən 470 milyon dollar vəsait ayırıb. Lakin seçkilərin nəticələri onun siyasi dəstək verdiyi qüvvələr üçün əlverişli olmayıb.
Maskın şirkətlərinin qərargahlarını köçürdüyü Texas ştatında da siyasi mənzərədə dəyişiklik baş verib. Məlumata görə, son bir neçə onillikdə ilk dəfə olaraq ştatın həm qubernatoru, həm də senatoru Demokratlar Partiyasının nümayəndələri olub.
Deutsche Bank analitikləri hesab edirlər ki, yeni qubernator Cina İnohesanın (Gina Hinojosa) rəhbərliyi altında Texasda yeni məlumat mərkəzlərinin tikintisi üçün icazələrin alınması çətinləşə bilər. Bundan başqa, Maskın şirkətlərinin ştat üzrə vergi güzəştlərindən yararlanmaq imkanlarının da azalacağı ehtimal edilir.
Demokratların Konqresin hər iki palatasında üstünlük əldə etməsi Maskın şirkətləri üçün tənzimləyici təzyiqlərin artması ehtimalını gücləndirib. ABŞ mediasında yayılan məlumatlara görə, demokratlar sahibkarın fəaliyyəti və onun şirkətləri ilə bağlı genişmiqyaslı parlament təhqiqatlarına başlamağı nəzərdən keçirirlər.
Bu vəziyyət Maskın daha əvvəl gündəmə gətirdiyi Tesla və SpaceX şirkətlərinin vahid strukturda birləşdirilməsi planlarına da təsir göstərə bilər. Tənzimləyici nəzarətin güclənməsi və mümkün siyasi maneələr belə bir korporativ birləşmənin həyata keçirilməsini çətinləşdirə bilər.
Seçkilərdən sonra formalaşan yeni siyasi mənzərə Maskın biznes fəaliyyəti üçün həm bazar, həm də tənzimləmə baxımından əlavə qeyri-müəyyənlik yaradıb.
MONETAR.AZ
