Almaniya Mərkəzi Bankı ölkə iqtisadiyyatının cari il üzrə inkişaf perspektivlərinə dair mühüm hesabatını açıqlayıb. Qurumun rəsmi bəyanatına görə, rəsmi Berlinin müdafiə sənayesi və infrastruktur layihələrinə ayırdığı irihəcmli dövlət vəsaitləri sayəsində Almaniya iqtisadiyyatı resessiyadan (iqtisadi geriləmədən) yayınmağı bacaracaq. Lakin buna baxmayaraq, Yaxın Şərqdə davam edən geosiyasi gərginlik və müharibə amili Avropanın bu ən böyük lokomotiv iqtisadiyyatına təzyiq göstərməkdə və daxili inflyasiyanı alovlandırmaqda davam edir.
Avropa Mərkəzi Bankının (AMB) inflyasiya ilə mübarizə məqsədilə faiz dərəcələrini artırmasından dərhal sonra açıqlanan bu hesabatda "Bundesbank" növbəti illər üçün iqtisadi gözləntilərini belə korreksiya edib: 2026-cı il üzrə ÜDM artımı: Ötən ilin dekabrında proqnozlaşdırılan 0,6% səviyyəsindən 0,5%-ə endirilib. 2027-ci il üzrə ÜDM artımı: Əvvəlki 1,3%-lik proqnoz əhəmiyyətli dərəcədə azaldılaraq 0,8% həddində müəyyən olunub.
Qeyd edək ki, Almaniya iqtisadiyyatı son üç il ərzində demək olar ki, durğunluq dövrünü yaşayır. Hökumətin planlaşdırdığı genişləndirici fiskal siyasət (əlavə büdcə xərcləri) xüsusilə yay aylarında ÜDM-in mənfiyə doğru getməsinin qarşısını alan yeganə əsas faktor rolunu oynayacaq.
Mərkəzi Bankın strateji hesablamaları göstərir ki, dövlət xərclərinin artırılması, xüsusilə də ordu və müdafiə sektorunun yenidən qurulmasına yönələn investisiyalar iqtisadiyyat üçün əsas hərəkətverici qüvvəyə çevriləcək. Proqnoza əsasən, bu hərbi xərclər 2028-ci ilə qədər ölkənin ümumi iqtisadi artımına bütövlükdə 1,3 faiz bəndi həcmində əlavə müsbət töhfə verəcək. Bu addım Yaxın Şərqdəki müharibənin gətirdiyi neqativ effektləri böyük ölçüdə kompensasiya edəcək.
Müdafiə xərclərinin iqtisadiyyatı canlandırmasına baxmayaraq, "Bundesbank" daxili bazarda yaranan fəsadlara qarşı xəbərdarlıq edib. Müharibə səbəbindən yaranan enerji şokları və yüksək tariflər əhalinin real alıcılıq qabiliyyətini zəiflədir, istehsalçı müəssisələri isə tədarük zəncirindəki qırılmalar və qlobal tələbin azalması ilə üz-üzə qoyur.
Eyni zamanda, yüksək kredit faizləri və ümumi qeyri-müəyyənlik mühiti özəl sektorun investisiya yatırmaq həvəsini məhdudlaşdırır. Bankın yekun rəyinə görə, ərzaq və enerji qiymətləri nəzərə alınmadan hesablanan baza inflyasiya göstəricisi 2028-ci ilə qədər AMB-nin hədəflədiyi 2%-lik optimal səviyyədən aşağı düşməyəcək ki, bu da iqtisadi aktivliyin zəif qorunması riskini saxlayır.
MONETAR.AZ
