Azalmanın əsas hissəsi repo bazarının payına düşüb. İlk doqquz ayda repo əməliyyatlarının həcmi 26,19 milyard manat olub ki, bu da ümumi dövriyyənin 78,1 faizidir. Repo əməliyyatları illik müqayisədə 14,16 milyard manat və ya 35 faiz azalıb.
Qeyri-repo əməliyyatlarının həcmi 7,34 milyard manat olub və illik müqayisədə 31,2 faiz azalıb. Lakin bu seqmentin daxilində alətlər üzrə fərqli dinamika müşahidə edilib.
Dövlət istiqrazları üzrə dövriyyə 1,62 milyard manat təşkil edib və ötən illə müqayisədə 5,85 milyard manat, yaxud təxminən 4,6 dəfə azalıb. Bunun əksinə, Mərkəzi Bankın notları üzrə əməliyyatların həcmi 2,94 milyard manata yüksələrək təxminən 2,4 dəfə artıb.
Korporativ qiymətli kağızlar üzrə dövriyyə də 2,4 dəfə artaraq 1,96 milyard manata çatıb. İpoteka istiqrazları üzrə isə əməliyyatların həcmi 808,4 milyon manat olub ki, bu da illik müqayisədə 30,7 faiz azalma deməkdir.
BFB-nin 9 aylıq nəticələri göstərir ki, ümumi ticarət həcmi əhəmiyyətli dərəcədə azalsa da, bütün maliyyə alətlərində eyni istiqamətdə dəyişiklik baş verməyib. Repo və dövlət istiqrazlarında geriləmə olduğu halda, Mərkəzi Bankın notları və korporativ qiymətli kağızlar üzrə ticarət artıb.
Bu göstəricilər kapital bazarında əməliyyatların alətlər üzrə bölgüsünün dəyişdiyini göstərir. Bunun müvəqqəti, yoxsa davamlı tendensiya olduğu isə ilin yekun nəticələrindən daha aydın görünəcək.
MONETAR.AZ
