Dünya Bankı Yaxın Şərqdəki geosiyasi münaqişələrin təsiri ilə qlobal bazarlarda ərzaq, yanacaq və gübrə qiymətlərinin kəskin bahalaşmasına qarşı Banqladeş iqtisadiyyatını sığortalamaq məqsədilə 1,1 milyard ABŞ dolları həcmində təcili maliyyə dəstəyi ayırıb.
Xüsusilə kiçik fermerləri və həssas əhali qruplarını qorumağı hədəfləyən bu iri maliyyə ineksiyası iki əsas layihə üzrə bölünərək ölkənin kənd təsərrüfatı dayanıqlığını və makroiqtisadi sabitliyini təmin etməyə yönəlib.
Gübrə və yanacaq tədarükündə yaranacaq hər hansı bir fasilə Banqladeş üçün sadəcə iqtisadi geriləmə deyil, həm də humanitar böhran mənası daşıyır.
Dünya Bankının bu paketi böhranın idarə edilməsi üçün operativ və sürətli maliyyə mexanizminə (mövcud layihələrdəki istifadə olunmamış vəsaitlərin strukturunu dəyişərək) əsaslanır və iyunun 30-na qədər tamamilə köçürüləcək.
Buna baxmayaraq, ölkənin rekord həddə çatan büdcə kəsirləri və daralan fiskal məkanı fonunda Banqladeş hökuməti valyuta ehtiyatlarını möhkəmləndirmək üçün növbəti mərhələdə Beynəlxalq Valyuta Fondu (BVF) və digər qlobal inkişaf tərəfdaşlarından da irihəcmli əlavə maliyyə və kredit paketləri almaq üçün rəsmi danışıqları davam etdirir.
Banqladeşə ayrılan bu vəsait klassik mənada inkişaf investisiyası deyil, birbaşa "yanğın söndürmə" xarakterli təcili yardımdır. Yaxın Şərq böhranı səbəbindən enerji və daşınma xərclərinin artması idxalçı ölkələrin büdcələrini sarsıdır.
Dünya Bankının vaxtında etdiyi bu müdaxilə Banqladeş valyutası takanın kəskin dəyər itirməsinin qarşısını almaq və ölkəni kütləvi ərzaq inflyasiyasından qorumaq üçün kritik bir sipər rolunu oynayacaq.
MONETAR.AZ
