ABŞ dollarının uzunmüddətli perspektivləri qlobal kapital axınlarında baş verən struktur dəyişikliklər, texnoloji transformasiya və geosiyasi proseslərin təsiri altında yenidən formalaşır. Bu barədə "Deutsche Bank" analitiklərinin son hesabatında bildirilir.
Bankın qiymətləndirməsinə görə, ən mühüm dəyişikliklərdən biri ABŞ-ın xarici kəsirlərinin maliyyələşdirilməsi mexanizmində müşahidə olunur. Geosiyasi gərginliyin artması fonunda xarici rəsmi investorların ABŞ dövlət istiqrazlarına marağı zəiflədiyi halda, ölkənin texnologiya sektoruna yönələn sərmayələr qlobal investorlar tərəfindən rekord həcmdə səhmdar kapitalı cəlb etməyə davam edir.
Analitiklər qeyd edirlər ki, dollarla nominallaşdırılmış borc alətlərinə rəsmi tələbatın azalması və özəl investorların səhmlərə üstünlük verməsi arasındakı fərq tarixi maksimum səviyyəyə yaxınlaşıb. Bu isə dolların əvvəlki illərlə müqayisədə mərkəzi bankların valyuta ehtiyatlarından daha çox risk iştahası yüksək olan özəl kapital axınlarından asılı vəziyyətə düşdüyünü göstərir.
Hesabatda ABŞ və Asiyada müşahidə olunan fərqli inkişaf istiqamətlərinə də diqqət çəkilir. Qeyd olunur ki, ABŞ-ın Qərb sahilində investorların əsas diqqəti blokçeyn texnologiyası və aktivlərin tokenizasiyasına yönəlib. Analitiklərin fikrincə, bu texnologiyalar Amerika maliyyə bazarlarına çıxışı asanlaşdıraraq xarici investisiyaların həcmini daha da artıra bilər.
Asiyada isə əsas diqqət Çinin yuanın beynəlxalq istifadəsini genişləndirmək strategiyasına yönəlib. "Deutsche Bank" hesab edir ki, bu proses hələ də bir çox Qərb investorları tərəfindən kifayət qədər qiymətləndirilmir, baxmayaraq ki, yaxın illərdə qlobal kapital axınlarının istiqamətini dəyişdirə biləcək potensiala malikdir.
Hesabatda həmçinin vurğulanır ki, bankın qiymətləndirmə modellərinə əsasən, dünyanın ən aşağı qiymətləndirilmiş valyutalarının böyük hissəsi Asiyada yerləşir. Belə ki, real dəyərinə nisbətən ən ucuz hesab edilən 10 valyutadan altısı bu regionun payına düşür və onların arasında iri sənaye iqtisadiyyatlarının milli valyutaları da var.
Analitiklər Avropada geosiyasi risklərin artdığı şəraitdə Çinin regional valyuta bazarlarında təsirinin güclənəcəyini proqnozlaşdırırlar. Eyni zamanda, Yaponiya ilə bağlı qeyri-müəyyənliklərin davam etdiyi bildirilir. İnvestorlar hökumətin fiskal, sənaye və iqtisadi siyasətinin yenin məzənnəsinə mümkün təsirlərini diqqətlə izləyirlər.
"Deutsche Bank"ın qənaətinə görə, qlobal maliyyə sistemində baş verən struktur dəyişikliklər fonunda investorlar dolların gələcək dinamikasını qiymətləndirərkən ənənəvi göstəricilərdən daha çox beynəlxalq kapital axınlarının dəyişən istiqamətinə diqqət yetirməlidirlər.
MONETAR.AZ
