Norveçdə inflyasiya təzyiqlərinin zəifləməsi davam edir. Ölkənin Statistika İdarəsinin açıqladığı son məlumatlara görə, baza inflyasiyası iyun ayında illik ifadədə 2,7%-ə enərək həm əvvəlki ayın göstəricisindən, həm də bazar proqnozlarından aşağı olub.
Rəsmi statistikaya əsasən, may ayında 3,4% təşkil edən baza inflyasiyası iyunda əhəmiyyətli dərəcədə geriləyib. Beləliklə, qiymət artımı tempi son aylarda müşahidə olunan yavaşlama meylini davam etdirib.
Nəticə bazar iştirakçılarının gözləntilərini də üstələyib. "Reuters" agentliyinin keçirdiyi sorğuda iştirak edən analitiklər iyun ayında baza inflyasiyasının 3,3% olacağını proqnozlaşdırırdılar. Eyni səviyyədə proqnoz Norveç Mərkəzi Bankı (Norges Bank) tərəfindən də açıqlanmışdı.
Baza inflyasiyası hesablanarkən enerji daşıyıcılarının qiymətləri və vergi dəyişiklikləri nəzərə alınmır. Bu göstərici mərkəzi banklar üçün qiymət sabitliyinin qiymətləndirilməsində əsas indikatorlardan biri hesab olunur.
İqtisadçıların fikrincə, inflyasiyanın gözləniləndən daha sürətli zəifləməsi Norges Bank üzərində pul-kredit siyasətini daha da sərtləşdirmək təzyiqini azalda bilər. Bu səbəbdən iyul ayında keçiriləcək növbəti iclasda faiz dərəcələrinin artırılması ehtimalının əvvəlki qiymətləndirmələrlə müqayisədə zəiflədiyi bildirilir.
Bazar iştirakçıları hesab edirlər ki, inflyasiyanın hədəf səviyyəsinə yaxınlaşması Norveç Mərkəzi Bankına iqtisadi artımı dəstəkləyən daha ehtiyatlı monetar siyasət yürütmək üçün əlavə imkan yarada bilər.
MONETAR.AZ
