“Premium Bank” ASC 2026-cı ilin birinci rübünün yekunlarına dair maliyyə hesabatını açıqlayıb. Hesabat dövründə bankın xalis mənfəətinin kəskin artmasına baxmayaraq, aktivlərin həcmində və depozit portfelində azalma meyli müşahidə olunur. Bankın maliyyə hesabatına əsasən cari ilin ilk üç ayında “Premium Bank”ın aktivlərinin həcmi ötən ilin sonu ilə müqayisədə 11 milyon 184 min manat və ya 1,7 faiz azalaraq 666 milyon 485 min manata düşüb.
Depozit portfelində daralma
Bankın öhdəliklərində qeydə alınan azalma əsasən müştəri vəsaitlərinin bankdan çıxması ilə xarakterizə olunur. Belə ki, hesabat dövründə bankdakı depozitlərin həcmi 20 milyon 70 min manat (5,1 faiz) azalaraq 374 milyon 103 min manata düşüb. Eyni zamanda, Mərkəzi Bank və dövlət fondları qarşısında öhdəliklər də 2,2 faiz azalıb.
Xərclərin artımı və ehtiyatların azaldılması
Maliyyə göstəricilərində diqqət çəkən digər bir məqam aktivlərin azaldığı bir dövrdə əməliyyat xərclərinin yüksəlməsidir. Bankın əmək haqqı və digər kompensasiya növləri üzrə xərcləri 19,7 faiz artaraq 2 milyon 75 min manata çatıb. Bununla yanaşı, bankın mümkün zərərlər üçün yaratdığı məqsədli ehtiyatların həcmi 43,6 faiz (567 min manat) azaldılıb. Ehtiyat ayırmalarının bu dərəcədə ixtisar edilməsi və bankın hesabat dövründə mənfəət vergisi ödəməməsi xalis mənfəət rəqəminin süni şəkildə yüksək görünməsinə şərait yaradıb.
Mənfəət və gəlir mənbələri
Bankın dövr üzrə xalis mənfəəti ötən ilin eyni dövrü ilə müqayisədə 2,3 dəfə artaraq 3 milyon 676 min manata yüksəlib. Faiz gəlirləri 9,9 faiz artaraq 9,7 milyon manat, haqq və komissiya gəlirləri isə 28,3 faiz artımla 3,1 milyon manat təşkil edib. Lakin banklar və digər maliyyə institutlarındakı depozitlər üzrə faiz gəlirlərində 38,6 faiz kəskin azalma qeydə alınıb ki, bu da bankın digər maliyyə institutlarındakı yerləşdirmələrinin səmərəliliyinin aşağı düşdüyünü göstərir.
Kapital və bölüşdürülməmiş mənfəət
Rübün sonuna bankın cəmi kapitalı 2,2 faiz artaraq 201 milyon 656 min manat olub. Səhmdar kapitalı dəyişməyərək 174,6 milyon manat səviyyəsində qalıb. Bölüşdürülməmiş mənfəətin həcmi isə 23,6 faiz artaraq 19,2 milyon manata çatıb. Qeyd edək ki, aktivlərin və depozitlərin azalması fonunda kredit portfelinin 4,7 faiz artaraq 500,9 milyon manata yüksəlməsi bankın resurs bazasının daralması şəraitində riskli kreditləşmə siyasətinin davam etdiyini nümayiş etdirir.
MONETAR.AZ
