İyulun 4-dən etibarən Bakı-Qəbələ-Bakı marşrutu üzrə hərəkət edən sərnişin qatarları Ucar stansiyasında da dayanacaq.
Bu barədə məlumatı "Azərbaycan Dəmir Yolları" (ADY) QSC yayıb.
Məlumata görə, yeni dayanacaq hər iki istiqamətdə fəaliyyət göstərəcək. Beləliklə, Bakıdan Qəbələyə və Qəbələdən Bakıya səfər edən sərnişinlər Ucar stansiyasından da qatarlara minib-düşə biləcəklər.
ADY bildirir ki, sərnişinlər qatarların yenilənmiş hərəkət cədvəli ilə qurumun rəsmi internet səhifəsində və "ADY Mobile" tətbiqində tanış ola bilərlər.
Qeyd edək ki, son illər ölkədaxili dəmir yolu daşımalarının inkişafı istiqamətində həyata keçirilən tədbirlər çərçivəsində regionlara səfər imkanları genişləndirilir. Bakı-Qəbələ marşrutu da daxili turizmin və bölgələrarası sərnişin daşımalarının təşviqində mühüm rol oynayan istiqamətlərdən biri hesab olunur.
Yeni dayanacağın istifadəyə verilməsi Ucar rayonunun sakinləri üçün nəqliyyat əlçatanlığını artırmaqla yanaşı, bölgənin iqtisadi və turizm potensialının inkişafına da əlavə töhfə verə bilər.
MONETAR.AZ
