Toyota şirkəti daxili bazarda modelin debütündən iki il sonra Toyota Land Cruiser 250 yolsuzluq avtomobilinin yenilənmiş versiyasını təqdim edib. Yeni versiyada standart komplektasiya genişləndirilib və oğurluğa qarşı əlavə texnologiyalar daxil edilib. İlk olaraq yeniliklər benzin mühərrikli versiyada tətbiq olunacaq, dizel modellər isə daha sonra yenilənəcək.
Toyota Land Cruiser 250 Yaponiyada ən çox oğurlanan avtomobillər sırasında olduğu üçün istehsalçı təhlükəsizlik sistemlərini gücləndirib. Yeni sistemlərdən biri açar ilə avtomobil arasındakı məsafəni ölçür və açar maşından kənarda olduqda qapıların açılmasına və mühərrikin işə düşməsinə imkan vermir. Digər sistem — T-Connect My Start Lock isə sahibinə mühərriki uzaqdan bloklama imkanı yaradır.
Modelin eksteryerində rəng çeşidi genişləndirilib. Retro üslublu dairəvi Bi-Beam LED faralar artıq VX baza komplektasiyasında da opsiya kimi təqdim olunur. Bu versiyada tıxacda hərəkətə yardım və zolaq dəyişmə assistenti kimi elektron köməkçilər də əlavə edilib.
Standart təchizata sürücünün oturacağının səkkiz istiqamətdə elektrik tənzimlənməsi və yaddaş funksiyası, həmçinin ön sərnişin oturacağının dörd istiqamətdə elektrik tənzimlənməsi daxildir.
Kapot altında əvvəlki kimi 2,7 litrlik atmosferik dörd silindrli mühərrik yerləşir. Bu mühərrik 163 at gücü və 246 Nm fırlanma anı hasil edir, 6 pilləli avtomatik transmissiya və daimi tam ötürücü sistemlə işləyir. Yaponiyada yeddi yerlik benzin versiyasının qiyməti təxminən 5,78 milyon yenadan başlayır.
MONETAR.AZ
